Mkg nung Discipleship Care & Counseling Training Center lapoktsü kimung mesemtet

Mokokchung, Oct 7 (TYO): Rev. Dr. I. Imkong Jamir lenisüba kübok World Aid Youth Mission (WAYM)-i Mokokchung nung Discipleship Care and Counseling Training Center ka lapoktsü nükjidong nung kimung ka Bodbarnü mesemtetogo.
Iba kimung mesemtetdang WAYM founder director, Imkongi jembidang, asen Naga lima nung yi aser miim mozü noktanga küm aika ayimtena sarasadema jaja arur, saka jembiba aser ayimtenba kijaji masü saka mapa küma inyaktsüji kanga tongtibangba lir ta ashi.
Ajioda, shirnok achiajemba lar küma lir, parnok nem tanela sobutsü terenemshiba angazükdak südaktsütsü nükjidong nung iba centre ya jara ki dang süaka sangküm 2016 nungibosa lapoktsüba tebilemba lir ta paisa shisem.
WAYM asoshi rongsen lenmang teyari kecha maka, saka amangbapur sarasadem aser teyari ajanga iba DCCTC ya lapoktettsü sarasadema inyakdaki. “Iba ya WAYM-i lapoker ta masü saka amangbapur ajak teyaritep nung lapokdi arung” ta paisa ayongzüka liasü. Kari item asoshi tongtepratepnüra iba mobile number (9402988869) nung jembitsü akok.