Mkg nung duplicate oset yoka senzür bulua kümdaki

Mokokchung, Aug 25 (TYO): Mokokchung nung tawa tanü tangalen nungi tzümartem telok balala arua nübur ashiokja tiazüla (duplicate) oset shitakba (original) oset amai yoka senzüba puteta arudaki.
Tanü Mokokchung Chamber of Commerce & Industries züngsem kari Salangtem ward Mokokchung nung Manipur nunger driver ka den tzümar asemi SONY Company indang television (LED TV 32 inch) tiazüla oset shitakba amai yanglur nübur ashiokja yoka senzüa lia apu.
Parnoki ayokba oset nungji Company tenüng dak alaka company indang license number kecha maket. Iba denji ano warranty/guarantee card nunger kecha maliasü. Shitakba agibo parnoki ayokba Sony LED TV 32 inch-ji sen 26,000/- nungi tenzüka jenjang balala indang lir, saka parnoki ayokba TV-ji teprangtsübo shitak amai saka sen 15,000/- agi dang yoka senzüa liasü.
Tanü nübur ashiokja Sony LED TV tiazüla yoka senzüa alirtemji; Mohammed Nafis (arishi küm 27) U.P nungi, Naved (33) U.P, Sonu (27) U.P aser Manipur nungi driver MD Nijamuddin (50) par pezü liasü. Parnok ya Maruti Van (No. MN01X7174) ka nung T.V-temji oshia bener Nagaland tesem balala nung yoka senzütsü sentong liasü, ta osang ajanga angazüker.
Par pezü ya Mokokchung Chamber of Commerce & Industries (MCCI) office-i anir arua MCCI ketdangsürtemi tarutsü nung iba ama nübur ashioktsüba mapa meinyaki nübur tajangzük asoshi business inyaktsü ajungshia liasü. Item tzümartemia iba amala mapa tanaben kodanga meinyaktsü nangzüka liasü.
Tawa toa tzümar telok kati Mokokchung nung Samsung TV duplicate shitakba oset amai yoka senzüba putetogo. Par telok yagi Assam Rifles CSD canteen nungi aruba oset ta shia nisung kar dang ayokba puteta liasü.
Item tzümartem yagi o tanang aser sen dalang agi kibong shia dangi kaoa osettem yoka senzür ashikülak mapa inyaker telok aika lir, anungji, nüburtemi parnok o nungji puadoker, osettsüset mashimashi malitsüla, ta MCCI ketdangsürtemisa tekümdangtsü o ka metetdaktsü.