Mkg nung elementary tesayurtem atema ‘Learning Outcomes’ training agütsür

Mokokchung, Oct 20 (TYO): EBRC Mokokchung Village-i ayongzüka yimtsüng nung elementary tesayurtem atema “Learning Outcomes” ta sür training ka yangi Mokokchung town hall nung agiogo. Iba sentong nung yimtsüngtem nungi tesayur in-service pur 260 shi adenshia tesayuba balala agütsüogo.
Hogulbarnep iba training tenzükba sentong nung Area Education Officer & Coordinator EBRC Mokokchung Village, L. Alemtemsü Ao-i mapang tatsüka agia jembidang, kaketshir/school tanur ajak nem school nung chichiba education angazükdaktsütsü nükla yur tesayurtem nem tesayuba, tasa balala aser tim meratem sayutsü asoshi iba sentong ya akar, ta training nükjidong lemsatep.
School takdang nung sayuba ajanga adokba (outcomes) jagi tesayurtem nem tesayuba-angazükba maparen (teaching-learning process) nung dang yarir masü saka iba ajanga chichiba education angazükba lenmang aisü nung teyari tulu agütsür, ta paisa shisem.
Iba sentong nung shisalen sayurtemji; C. Wati Walling (TOT’s), Talitoshi (TOT’s) aser Chubalepden (TOT’s) par asem lir. Kasa sentong ya Oct 21 nü Town/Urban area pur atema balaka katsütsü, ta osang ajanga angazüker.