Mkg nung exercise agidak tesem ka lapok

Tsürabur Wb. Süpongtemsüi Mokokchung nung Fitness Studio lapoktsüba noksa nung angur. Mokokchung, November 7, 2016.

Mokokchung, November 7 (TYO): Nüburtem anema alitsü asoshi exercise agidak “Fitness Studio” ta sür dokan ka tsürabur Wb. Süpongtemsü Longkumer ajanga Hombarnü lapoktsüogo. Iba ‘Fitness Studio’ ya Mokokchung Classic Bakery anasa Imsong building nung amenoka lir.
Iba studio nung exercise agiba osettsüset tabensa amenoka lir. Iba den ano tajung kaji exercise agiba mapang ken anganür atema music system teperi yuja kar aser metsü-meshidak aser pei jurila oset ayudak locker dena lir.
Tanü Wb. Süpong Lkri iba studio lapokja jembidang, pa arishi küm 15 asüdang nungi anema alitsü (fitness) maparen tenzükba tanü küm 57 tashi khena medoktsüi inyaka arur, ta ashi.
Pai ashiba agi, par mapang fitness maparen ya Nagaland nung dang masü India nunga kangabo bulua maliasü, tesayura mali asünung teimbaka peisasa dang angazük aser ano magazine balala zünger item nung jagi angazüka benshia liasü. Pa lanuwa pai kanga sapuba body builder-ji Arnold Schwarzenegger liasü ta ashi.
Lanurtem nem inyakdaktsünüba olen ka pai ashidang, temang anema aser shitak linüra achiajemba azüoktsüla, libaliru ajungtsüla, metsü-mersü ajema achitsüla, merükmeju aser peisasa azüokba den anema aliba maparen nungji temulungtetba nüngdaker. Tsürabur Süpong Lkr ya Naga nunger rongnung body builder mezüngpur lir.
Iba studio kibur Sp. Akok Imsongi iba studio lapokba nükjidong kar lemsatepdang, pa saisapong jangraba nisung ka asünung, India len saisapong balala asaya jajaba mapang nisung ka taküm nung anema alitsübaji kanga tongtibang ta meteta aru, iba den Mokokchung nung iba ama exercise agidak tesem tajung nüngdakba ajiteta ibai lapokogo, ta ashi.
Tanü asüng tashidak tapu balala exercise agiba ajanga dang koktetsüba lir, anungji, iba studio ajanga Mokokchung nüburtem lenmang balala nung tajangzük angutsü imlar, ta paisa shisem.
Fitness Studio nung denürtem atema küm piyong atema registration fee 1000/- agitsü, iba den ita ka atema sen 1000/-, ita trok atema 5000/- aser küm piyong agitsü atema sen 9000/-  ta package telemsa yamaji lir.
Mapangji asenoki shimtsü akok; anepdang telok ana (5:00 – 6:30 aser 6:30 -8:00) aser nikongdang telok asem (3:00 -4:30, 4:30 – 6:00, 6:00-7:30) ta lemsaa lir. Iba dak sentakba nung osang tejangja ngunüra iba number (9436626962) nung tongteprateptsü akok.