MKG nung Fazl Ali College tenzüker küm 57 ajungba anogomung mungogo

Mokokchung, Sepember 08 (TYO): Taküm nung tesayur mapa ya tamaren mapa ka lir, aji oda, tesayur kati kaket nung aliba lesson kisüng masü saka tanü asenoki ajuruba loktiliba tebilemtsü balala indanga kaketshirtem nem angatetdaktsütsü nüngdaker.
Iba o ya MLA & Adviser to Chief Minister, Wb. Merentoshi R Jamir-i Brihostibarnü yangi Mokokchung nung aliba Fazl Ali College tenzüker küm 57 ajungba anogo amungba den repsema Creative Arts Competition sentong ka nung tongti tesemdanger o jembidang metetdaktsü.
Paisa ashiba agi, Fazl Ali College ya Nagaland nung tejentiba college ka lir, “tejentiba college ta asüba nungji tejakleni awa-oa inyaktsü khuret-a lir,” ta metetdaktsü.
Shisaliok junga angutsü asoshi tesayur o kaketshir tsüngda tesendaktepji kanga tongtibang lir, aji oda kaketshirtemi tesayurji tsübuseta masü saka pei tebilembatem sadok-sadoka shiteta angazükdaktsütsü nüngdaker, ta paisa inyakdaktsünüba olen ka ashi.
“Taküm nung tesayur mapa ya tamaren mapa ka, aji oda tesayur kati kaket nung aliba lesson kija masü saka tanü asenoki ajuruba loktiliba tebilemtsü balala indanga angatetdaktsütsüla,” ta paisa ashi.
Kaketshir shia mangdang balala yur iba reju nung adenshia lir, aji oda, kaketshir shiai pei dak temulung lemtetba ajanga pei aotsü lenmang nung tsükdak-ondak ajurubatem koktettsü, ta paisa kaketshirtem dang pei sasa dak temulung alemtsü asoshi ajungshia liasü.
Paisa temelenshi tenzükdaktsünüba olen kar ashidang, “Temelenshiji pei dak nungi tenzüktsüla, pei/kija memelenshira kodaser lokti nung temelenshi bener arutsütet?” ta paisa asüngdanga ashi.
“Temelenshi bener arutsü asoshi mezüngbuba nung pei mulungsentsü aser libaliro melenshitsüla,” ta paisa metetdaktsü.
Paisa kaketshirtem dang social networking/internet timi amshitsü asoshi ashidang, “Tanü putu nung social networking ya kanga tongtibang kümogo, aji saka, asenoki iba maongkaji tim lenmang nung amshira yangji tajangzüktsü lir,” ta metetdaktsü.
Asen lima nung mapa manguba tebilemtsü kar lemsatepdang pai, sorkar mapa angutsü lenmang sadema mali kümogo. Nagaland ya India nung sorkar mapa inyaker teimtiba aliba state lir. Budget noklang shilem nung 65% itasen nung dang indoker aser terenlok asoshibo 35% shi dang anünger, ta metetdaktsü.
Iba ama tensa ka nung lanurtemi “züngzüker sorkar mapa inyaktsü ta asüba mulungsentsüji tama melenshitsüla”. Alima nung ya sorkar mapa kisüng masü tanga teinyaktsü mapa jenti lir. Anungji, lanurtemi mangdang tajung yur private sector nung temulung agütsütsü asoshi paisa ayongzüka liasü.
Kasa sentong nung academic award nisung asem nem agütsü. Mezüngbuba nung Evangelical Union Award  of the year 2016 Kr. Chungliu M Lam (B.Sc Vth Semester) nem agütsü, tanabuba Linnaeus Award 2016 senpetji Kr. Temjensongla Longkumer (CGPA-5.89=84.14%)-i angu aser tasembuba CAAT 2016 Chubaienla Award for academic topper senpet Kr. Lipokienla Jamir (CGPA-6.26=89.42%)-i agizüka liasü. Parnok ajak nem senpet nüngo kaket den sen densema agütsü.
Taküm creative arts tetoktepbatemji; Mr&Miss fresher 2016, asemtepba (marathon race), o toktep (debate), solo, jilushi (one act play), jepdak jembi (extempore), otsünu zülu (essay), rong atepba (painting) nungertem liasü. Tetoktepba nung takoker ajak nem senpet sen den nüngo kaket tajung kaka agütsü.