Mkg nung free eye camp sentong akar

Mokokchung, June 17 (TYO): “Asen tenük ka senti, asenoki ibaji anepaludi” omen nung ajemdaker Chandraprabha Eye Hospital Jorhat (Assam) den yaritepa Mokokchung District T20 Cricket Association (MDT20CA)-i Imkongmeren Sports Complex Mokokchung nung ‘Free Eye Camp’ sentong tuluka ayongzüka kadaki.
Iba sentong nung Chandraprabha Eye Hospital Jorhat nungi tenük doctor Dr. Himanghshu Das, Dr. Pankaj Burgute den ano Senior Programme Manager, Emmanuel Benia, Senior Project Coordinator Rituraj Gogoi aser Optometrist pezü densema atua lir. Mezüng anogo nung Mokokchung town aser temeket yimtsüng aser tesem balala nungi nisung noklang pungu shii treatment balala agiba osang angazüker.
Iba camp nung tenük reprangba ajak angati aser tenük aina (glass) aser frame nunger dang noklang shilem nung tenem shilem agi ajemer agütsür (50% discount). Iba den ano Mokokchung HDFC bank anasa aliba Shalom Optical dokan nung cutting aser fitting nunger 50% discount nung sütsütsü jembia lir, ta tayonger MDT20CA ketdangsürtemi iba osangbener den jembidang ashi.
Iba camp nung tenük kanga majungertem kari danga Chandraprabha Eye Hospital nung operation agira jenjang tajemba nung agitsütsü, saka iba camp nung adenba kuli (refer chit) nungdaktsü, ta Emmanuel Benia-i iba osangbener den jembidang ashi.
Class 12 science passed sür alir kari danga Optometry azüngtsü jangra lira, Jorhat nung Ridley College of Optometry nung küm pezü atema B. Sc Optomerist ta sür course ka agütsür, admission-ji taruba July ita nungi tenzüktsü, anungji, tejangrartemi iba maongkaji agitsü akok, ta Emmanuel-isa shi.
Chandraprabha Eye Hospital pur asoshi Nagaland-i iba ama free eye camp atuba ya ibai mezüngbuba lir. Iba camp ya June 18 tashi alitsü aser anepdang 10:00 ako nungi nikong 5:00 ako tashi akatsü. Aiben iba ama maongkaji asenok dangi marutsü, anungji, nüburtemi iba maongkaji agitsü asoshi MDT20CA ketdangsürtemi ayongzüka ashi.