Mkg nung ‘Green Craft’ ta sür Eco-friendly store ka lapok

MCCI Tir, Tsükti Longkumer-i Longkumer Kilem, Mokokchung nung Green Craft dokan ka lapoktsüba mapang tangokba noksa nung angur. Mokokchung, November 19, 2018.  

Mokokchung, Yimpoksüi/Nov. 19 (TYO): Mokokchung Chamber of Commerce and Industries (MCCI) Tir, Tsükti Longkumer-i Hombarnü Longkumer Kilem, Mokokchung nung ‘Green Craft’ ta sür dokan ka lapoktsüogo. Iba dokan meshiteta Mokokchung Town Baptist Arogo Pastor, Rev. Ponen Longchar ajanga sarasademtsü.
Tsükti Longkumer-i iba dokan lapokja jembidang, iba dokan ya ajanga liso teka mapa inyakertem talisa parnoki inyakba mapatem sayuba den ayoktsü asoshi sabang tajung ka asütsü imlar, ta ashi.
Mokokchung ya market tulua masü aser ano kanga tilaa masü aser Mokokchung market ya tanga yimti dang nungi tera balaka lir, anungji, osettsüset ayokba nung tebilemtsü aser timtem kar ajurutsüa akok saka tezü metangi maneni inyaktsü asoshi paisa ajungshia liasü.
Green Craft kibur, Nokti Longkumer-ia iba dokan lapokba nükjidong kar lemsatepdang, alima tzü mopung memenenba (eco-friendly) oset ya bendanglenbo nüburtemi kanga sapua amshiteper aser market nunga ibai kanga demand aliba den asen lima au, ar aser süng agi osettsüset tapu balala yanglurtem tajung aika lir, saka parnok asoshi tebilemtsü tulutibaji ayoktsüba ya lir, anungji, parnok nem sabang lapokja ibala business inyakertem nem lenmang lapoktsütsü nükla yur iba ya tenzüker, ta ashi.
Asen lima au, ar aser süng peria dang angur, iba denji ano asen nisungtem dak teka mapa balala inyaktsü sempet lir, parnokji anitena parnok nem market lapokja ajungshitsü aser tarutsü nung machine balala bener arua ibala mapa tajungba renloka aotsü asoshi mapa balala sayutsü tebilemba lir, ta laisa shisem.
Green Craft dokan ya Longkumer kilem Shopping Arcade 1st floor nung lir. Tangji iba dokan nung ya au, ar aser süng agi yangluba furniture, kinaro, ki oset aser nungdakba osettsüset tapu balala sen 40/- nungi tenzüka 42,000/- jenjang tashi indang angutsü. Iba dokan nung nungdakbapurtemi pei aginüba design-tema yanglutsütettsü. Mokokchung nung iba amala eco-friendly temeja dokan lapokba yabo ibai mezüngbuba asütsü.