Mkg nung I-Day amungba osang

Mokokchung, Luroi (August) 15 (TYO): Mokokchung nunga 72 buba India nunger nüchiso anguba anogo “Independence Day” sentong yangi Imkongmeren Sports Complex nung takok ngua mungogo. Iba sentong nung Minister for Urban Development & Municipal Affairs, Metsübo Jamir tongti tesemdanger liasü.
Tanep India national wako asongba maparen agir külen 2nd NAP puri kongki ola ajanga National anthem atem, iba sülen tongti tesemdangeri parade inspection or arua renema akaba o azüng aser march past agi. Aji sür, district award angurtem nem senpet lema agütsü. Taküm parade contingent nung shilem agirtemji telok 14 liasü.
Sentong nung Fazl Ali College, Queen Mary Hr. Sec. School, Town Hr. Sec. School, Jubilee Memorial School, Taekwondo Association aser Mokokchung Police parnoki kentenmenü aser jilunu balala ia tesentepertem peladaktsü.
Sobaliba sentong nung; Amoklushi Cultural Club Chuchuyimpang, Longsalong Cultural Club, Sumi Union Mokokchung, Sangtam Union Mokokchung aser 44 Assam Rifles nungertemi shilem balala agia liasü.
Tongti tesemdanger Metsübo Jamir-i District Agriculture Office-i achayanga ayongba organic stall ka lapoktsü. Iba stall nung aluyimertemi mozü medeni züsentetba aonsotsü aser sünglijang tapu balala sen dalang agi yoka liasü.