Mkg nung Inter-Club badminton championship tenzükogo

Mokokchung, Sept 28 (TYO): Ajaki yongsaseta ataba Mokokchung Inter Club Badminton Championship 2017 Brihostibarnü nungi yangi Mokokchung Badminton Stadium nung meraketa tenzükogo. Iba asayamung ya Mokokchung District Badminton Association-i ayongzüka akar.
Taküm iba asayamung nung Mokokchung district kübok club 8 nungi telok 10 arua shilem agidar aser item team-ji group ana ‘A&B’ küma lemsar asayadaki.
Iba asayamung ya tongtibangsa badminton asaya nüngtugu kümdaktsüba den club-tem jenjang ajungkettsütsü, lanur sempet aketertem ajungshia anidentsü, senotsü lenmang ajangzüktsü aser asayaba maparen ajak nung professional südaktsütsü nükjidong yur taküm agi kümnabuba ayongzüker.
Tanü iba asayamung tenzüktsür Imli Jamir (Dimapur)-i mapang tatsüka agia o jembidang, nükjidong ka ataloktsü asoshi kodanga tezü matangtsüla aser timtem balala ajurudang tali tazüokba nung maneni merangshia asayatsü asoshi ayongzük.
Naga nunger dak saisapong asayatsü sempet lir, aji saka, tesasatsü kaji; sempet aketer aika jungnüseta senotsü nung tsükdakba ajanga temaba jenjangi metuteti lir, ta ashi. Saisapongba indang ya aroka metettsüla, kechiyong yangi meranga inyakba den tazüokba kanga nüngdaker, ta paisa asayartem dak lidaktsünüba o ka ashi.
Asaya telemsaji yamai; under 13 (Boys Singles), men’s doubles, Under 15 (Girls’ Singles), Under 17 (Boys’ Singles), Junior (mixed doubles), 35+ (veterans men’s doubles) aser 45+ (veterans men’s doubles) nungertem lir.
Iba asayamung nung takok angurtem asoshi senpet ajak senteper lakh ka shi alang agütsütsü, ta tayongertemi metetdaktsüogo. Mokokchung nung Badminton Inter-Club asayamung akaba ya Nagaland nung ibai mezüngbuba asütsü. Iba asayamung ya September 30 nü tembangtsü.