Mkg nung Khensa Marketing Complex ta sür ka tenzükogo

Mokokchung ADC & MMC Administrator, W. Manpai Phom ajanga ‘Khensa Marketing Complex’ tenzüktsür külen sentong nung shilem agia adenertem kar noksa nung angur. Mokokchung, June 11, 2019.

Mokokchung, Aami/June 11 (TYO): Mokokchung alirtem atema osang tajung kaji Sangtemla Ward nung ‘Khensa Marketing Complex’ ta sür ka June 11, 2019 nü Mokokchung ADC & MMC Administrator, W. Manpai Phom ajanga tenzüktsüogo. Iba marketing complex ya Land Resource Department Govt. of Nagaland aser Khensa Village Council nadi külem sür achaayangba mapatong ka lir.
Iba complex tenzükja Manpai Phom-i mapang tatsüka agia jembidang, Mokokchung town nung nungdakba tapet mapa ka inyakba asoshi pelaba den iba ya ajanga lenmang aisü nung nübur nungdak aika peritsü imlar, ta ashi.
Pai Naga nunger dak jakla tamajung ka tuteta ashidang, asenoki business ya tuluka nungi dang tenzüknür, iba jaklaji melenshitsüla aser mapa ajak tila nungi tenzüka tuluba kümdaktsütsü merangtsüla aser iba marketing complex ajanga business tilateri inyakertem ajungshitsü aser tajangzük balala angutsü imlar, ta metetdaktsü.
Iba complex nung plastic bag masü biodegradable bag amshitsü ta ashibaji osang tajung ka lir. Tanü alima nung plastic tebilemtsü ya ulura kümogo, plastic bag mamshitsü ozüng lir saka iba ozüngji junga bener moutetba mapang ka nung iba ama mapa tajung inyakbaji jangratemtsü mapa ka lir, ta paisa ashi.
Plastic tebilemtsü ya arok khuret, anungji, tangar dang tatishitsü sayutsü asoshi Mokokchung ya “plastic free town” ka kümdaktsütsü merangdi aser plastic tebilemtsü indang osang ya nübur ajak dang sangdongdi, ta paisa inyakdaktsünüba olen ka lemsatep.
Paisa Mokokchung Inter State Bus Terminals (ISBT) junga mapa makümba tebilemtsü kar lemsatepdang, tang tera mapa küma odar, anungji, ibai jungjunga mapa küma amshitettsü asoshi telok ajaki nungita yariteptsü asoshi paisa ayongzüka ashi. ISBT ya kodang junga amshitetdir, iba yagi Mokokchung nung traffic tebilemtsü tuluka ajema akümtsü aser nüburtema lenmang aisü nung tajangzük angutsü, ta paisa shisem.
Iba marketing complex ya tongtibangsa zünger mapa mungui alirtem talisa tetsürtem nem rongsen lenmang bushitsü atema mapa inyaktsü maongka lapoktsütsü nükla yur tenzükba lir, ta DPO, LRD, Mokokchung Dr. Sashiyangbai ashi.
Iba complex nungi tenzüka biodegradable bag amshitsü aser asen lima mezüng süa local organic coffee amshia tenzüktsü, ta pai ashi. Office-i aor atema shishilembatsü tebilemtsü ajuruba ngua iba complex nung aonung bazar lapoka aonsotsü tapu balala shishitettsü, ta paisa shisem.
Tanü iba sentong nung Rev. K. Temjeni temoatsü meshia sarasadem aser Khensa putu yimsüsür nungia kadi shilem agia jembi.