Mkg nung MDM jang tamajung alemba kuli nguogo

Dimapur, April 28 (TYO): Brihostibarnü Mokokchung Town Lanur Telongjem (MTLT)-i District Administration, Chief Medical Officer, Food Safety Officer, aser Sub-Divisional Education Officer nunger matsüngdang MDM jang tamajung agütsüba kuli süogo.
Taoba mapang MTLT-i CMO, Mokokchung dang MDM jangji laboratory nung tendangtsü atema asüngdanga liasü aser Food Safety Officer, Mokokchung ketdangsüba nung jang tendangtsü bener yok, ta Media Cell, MTLT sangdong ka nung metetdaktsü.
April 11, 2016 nü State Public Health Laboratory ajanga  sangoktsüba osang nung, MDM jangji jenjang tamajung aser aina jaksa, jangnem aser tamachitsütem meyoktepa aliba ajanga temang nung timtem agütsütsüsa liasü, ta shia lir.
State Public Health Laboratory-isa MDM jang nung shiruru tila aika liasü aser shiruru entsütem liasü ta shia lir aser iba jagi MDM jangji nisungi chiyungtsü atema majung ta kuli agütsüogo, ta shia lir.
Loktiliba nung telok balalai mapang shitak nung osang sangoktsüba aser yaritepba aser MTLT-i iba asoshi mapa inyakba ajanga kaketshirtem timtem tulu ka nungi jenbuogo. Iba denji bangdak department temi teinyaktsü mapa shitak inyakba ajanga iba ken o tiptema tembangogo.