Mkg nung mezüngbuba construction workers-tem atema soft skill trg aser parnok chirtem atema career counselling sentong ayonga akar

Mokokchung, Dec 6 (TYO): Govt. of Nagaland Department of Labour kübok Nagaland Building & Other Construction Worker’s Welfare (NBOCWW)-i anogo asemnü atema ‘training on soft skill for construction workers aser career counselling for children of construction workers’ ta sür shisatokden sentong tapu ana ayongzüka Mokokchung nung tesem balala lemsar agidaki.
Tanü iba training tenzükba sentong Mokokchung Town Baptist Arogo (MTBA) senden kilem nung agidang, Mokokchung D.C, Sachin Jaiwal IAS-i Naga nungeri tazüngba tulu zünger külen teimbai sorkar mapa inyaktsü dang jangrar aser bushir, iba yimya ya melenshitsüla, kechiyong nüngtugu University tajung nung zünger aruagi sorkar mapa tilateri inyakbaji jangra matem aser pai/lai shia metetbaji nüburtemi magishir, ta paisa ashi.
Pei taküm nung mapa shimba ya tsüraburi jangraba nung masü, saka pei sempet aser tashi meteta iba lenmangji shimtsüla, kodang yamaji südir taküm nung liyonga aodang tetsükdaktsü majurtsü, ta paisa ajungshia liasü. Asen jakdang maongka kechisa arudir, itemji bushitsü asoshi paisa ayongzüka liasü.
Construction Workers-tem atema ‘Soft Skill’ training-ji Mokokchung ITI (Marep) nung tesem ana nung aser tangatemji Sungkomen Community Hall, Artang Community Hall, Tongdentsüyong Community Hall aser Penli Community Hall nungertem nung agidar. Iba sentong ya Dec 6 nungi Dec 8 tashiji anepdang 10:00 ako nungi tenzüka kasa tesem nung dang alitsü.
Ano Career Bridge Human Capital Solution, Gurgaon den yaritepa NBOCWW-isa MTBA senden kilem nung ‘construction workers’ chirtem atema ‘Carrer Counselling’ dak sentakba nung shisatokden sentong balaka ayongzüka kadaki. Iba sentong nung anogo asemnü Mindscan Education (India) nungi arur shisalen sayur Mandeep Singh-i tesayuba balala agüja arudar.
Construction workers chirtemji aiben tangar anguba maongka mangur, anungji, itemji anitena parnok nem lenmang balala sayua maongka agütsütsü nükjidong yur iba sentong ya ayongogo aser ibaji ajanga parnok taküm lenmang nung yaritsü imlar, ta Deputy Director, Employment Skill Development & Entrepreneurship, Chiden Yaden-i osangbenertem den jembidang ashi.
‘Soft Skill’ ya tongtibangsa pei teinyakba mapa balala nung mongin süa inyakba (professionalism), külem mapa inyakertem akhümtsübua inyakba, telungjem nela (team spirit) ajungmesotsü, mapa timi inyakba tangatetba (works ethics), item nung tesayuba balala agütsütsü nükjidong nung iba ya bener aruba lir, ta paisa lemsatep.
Sentong nung nung Career Bridge Human Capital Solutions Gurgaon (India), Director, Vikas Rau-i anogo asemnü training balala agiyonga aotsüba indang lemsatepa liasü. MTBA Pastor, Rev. Ponen den temoatsü meshia sarasademer iba sentong tenzüka liasü.
Iba training nung adeni arurtem nem oli-aruli nung yariteptsü atema nisung shia nem Travelling Allowance agütsür, iba den anogo shia chiyungdaktsütsü aser iba training atema tenüng züluba (registration fee) taa kecha magir. Anungji, tejangrar ajak marendaki arua iba nungji shilem agitsü asoshi tayongertemisa ayongzüka metetdaktsü.