Mkg nung mezüngbuba Nagaland Guitar Festival 2021 takok ngua mungogo ; Iba benjong ya kümshi Mkg nung ayongzüktsü

Mezüngbuba Nagaland Guitar Festival 22nd Oct nü Mokokchung nung akadang guitar atem toktepba nung takoker Imtiwabang Imchen-i shilem agidang tangokba noksa nung angur.  

Mkg, Oct. 22, 2021 (TYO) : Mokokchung nung mezüngbuba Nagaland Guitar Festival 2021 sentong 22 Oct, 2021 nü yangi “Just A Venue” nung takok ngua mungogo.

Iba benjong nung Nagaland nungi nüngtugu guitarist; Arenlong Lkr, Atsa Lang Roths, Mhaseve Tetseo parnoki guitar workshop & sensaksem sentong nung shisalen sayuba den guitar atem tetoktepba nunga parnokji tetendanger liasü aser sentong nung parnoki guitar tema shilem agiba ajanga tesentepertem kanga longsodaktsü. Note Grid School of Music Mokokchung nungia tetsür solo guitarist kati shilem tajung agia liasü.

Iba benjong nung ano ‘Six Strings Guitar Contest’ ta sür guitar temtepba tetoktepba ka liasü aser iba nungji; Mokokchung nungi Imtiwabang Imchen-i mezüngbuba jenjang angu aser tanabuba senpetjia Mokokchung nungisa Mayang Lkr-i agizük. Takoker nem senpet sen 40,000/- aser 20,000/- senpettsü aser iba senpetji Naga Musicians Collective (NMC)-i agütsü.

Iba sentong nung tetushi tejaoker Mokokchung D.C Limawabang Jamir-i o tatsüka jembidang, Nagaland CM Neiphiu Rio-i anir state sorkari Nagaland nung lanur kentenmenü sempet aketer aser musician-tem jenjang ajungkettsütsü aser tejakleni renloka aotsü asoshi maparen balala inyaker, anungji, iba maoangkaji lanurtemi agitsü merangtsüla, ta ashi. Naga nunger dak kentenmenü tsütsü sempet alakteta moaja lir, anungji, asenoki iba sempetji tim lenmang nung amshitsü asoshi paisa ayongzük.

“Nagaland Guitar Festival” ta kümshi agiba sentong ka kümdaktsütsü aser ibai Mokokchung nung dang ayongzüktsü, ta TaFMA Project Director, Dr. Hovithal Sothu-i sangoktsüogo. Iba benjong ya taküm mezüngbuba ayongzüka akar, aji oda, taruba küm tajungba ayongtsü merangtsü aser iba benjong ya International kümdaktsütsü nükla yudi, ta pai ashi. TaFMA-i musician-tem tejakleni anir aotsü pungmang mangdang aika lir, ta paisa shisem.