Mkg nung mezüngbuba ‘soft skill training’ ayonga akatsü

Mokokchung, December 04 (TYO): Mokokchung nung mezüngbuba “Soft Skill Training” ta sür teka mapa balala inyakertem (labourers) aser mapa mungui alirtem (unemployed) asoshi training ka Dec 6 nungi 8 tashiji ayonga lir, ta osang ka ajanga angazüker.
Iba ‘Soft Skill Training’ ya tesem trok (6); ITI Mokokchung, Artang Community Hall, Penli Community Hall, Sungkomen Community Hall, Tongdentsuyong Community Hall ta küma lemsar anepdang 10:00 ako nungi tenzüka agitsü.
Iba training nung adeni arurtem nem oli-aruli nung yariteptsü atema nisung shia nem Travelling Allowance senpak 300/- agütsütsü, iba den anogo shia chiyungdaktsütsü aser iba training atema tenüng züluba (registration fee) kecha magitsü, ta ITI Mokokchung ketdangsür ajanga metetdaktsüogo.
Iba den repsema ano December 6, 2017 nüji anepdang 10:00 ako nungi tenzüka “career guidance” ta sür lenmang balala sayuba shisatokden sentong ka Mokokchung Town Baptist Arogo (MTBA) senden kilem nung ayongzüka lir. Iba sentongji Mokokchung D.C Sushil Kumar IAS-i tenzüktsütsü aser shisalen sayurtemji Gurgoan (India) nungi arutsü, ta osang angazüker.
Iba sentong ya tongtibangsa asen district nung lanur mapa mungui alirtem tangar dak metaloka melii pei sasa tepok sünga lidaktsüba den achaketa alitsü nükjidong nung ayonger, anungji, tejangrar ajak marendaki arua iba nungji shilem agitsü asoshi tayongertemisa ayongzüka metetdaktsü.