Mkg nung Nagaland GB Federation lokti senden akar

Mokokchung, Nov 18 (TYO): Nagaland GB Federation pur lokti senden Bodbar aonung nungi tenzüka yangi Mokokchung town hall nung kadaki. Iba sentong nung Nagaland tesem balala nungi Gaonbora-tem aika adenshia shilem agia dendaki.
Taonung tongti o jembir taoba Nagaland Addl. Chief Secretary & Commissioner Wb. T.N Manen IAS-i jembidang, GB-tem ya Nagaland nung tashi tulutiba aketba NGO telok ka dang masü, saka ibai Naga nunger lokti rongnung tejentiba lir ta ashi. GB-tem ya Naga nunger mulungtet telok Naga Hoho, ENPO, Tenyemi, CNT nungertem den tashi tuluba lokti ka lir ta paisa shisem.
GB telok ya dang NGO rongnung telemsa kecha melii Naga nunger temang ayimjemba telok ka lir, parnok ya Naga nunger telungjem asoshi temaitsü (nissan) lir aser ibaji tanga loktitemi metongteter. parnok nem ya liso nübur madak yimsüsütsü asoshi sorkari yimsüsüba aser ozüng tashi agüja lir saka parnok ya sorkarlar masü ta paisa metetdaktsü.
GB ka asütsübaji nisung mashimashi meshimer saka parnok ya pei yimtsüng, kin aser kidongtem rongnung lennir kaka lir aser parnok ya sobaliba temzüng ozüng aser lipoklisang metetertem dang lir ta paisa ashi.
“Nenok lungjemra ibai kanga dang togtibang aser tashi tulutiba aketba lokti ka kümtet” aser ibaji “sobaliba temzüng ozüng aser benshia aruba lipokren nung dang masü saka loktiliba aser yimtenyimli nunga temelenshi tajung bener aruba lokti ka kümtet” ta paisa ashi.
Taoba mapang Naga nunger telungpur tsüngda azü tokshi anendaktsütsü asoshi GB aser DB Joint Forum-i achayanga yimjung mapa tulu inyaktsü merang, aji oda, Naga nunger temapur aser telungpur telok ajak ajurua kanga meranga inyak aser ita trok meraratsü ceasefire yanglu. Aji saka, tia maka iba ceasefire mapangji tembangerbo Forum-i iba yimjung maparenji anenadok, tesü FNR-i iba maparenji tenzüka arudagi, anungji, FNR nem tenüngsang agütsütsü tetemsü ta paisa ashi.
Tang koba India sorkar o NSCN (IM) na tsüngda 3rd August Framework ka yanglua jembishinüdagi, iba nungji GB-temia tarutsü Naga yimten tia dak sentakba nung shilem agitsüla ta paisa inyakdaktsünüba olen ka ashi.
GB union-temi angati service agüja sorkar yimsüsüba nung yariba, nübur tsüngda apu alaba, lokti tebilemtsü ajurudang yaritsü merangba aser keno balala adokdang shilem agiba angur, saka sorkar aser nüburtemi parnok kanga sendoker aser parnokia parnok dak aliba tashi yimdangi marur ta paisa ashi.
Tongti o jembirisa Nagaland nung GB lokti tenzükba otsü, GB reju indang, GB-tem mapa, taoba mapang GB-tem shimba yimya aser parnok nem maongka agütsübatem tadongi rateta agütsüba den tagitsü o aika lemsatepa liasü.
Kasa sentong nung Mokokchung DC Sushil Kumar Patel IAS, Mokokchung Distrist GB Association Legal Advisor Adv. Takuyaba, MDGBA tir Imo aser NGBF nung tatong tir Hingtung Chawang nungertemi tepela o den tayongzükba o tulu bener arua jembi. Mokokhcung Sumi Baptist Arogo Choir aser ENPO Mokokchung unit nati ken ajanga tesentepertem saksalemdaktsü.