Mkg nung ‘National Road Safety Week’ among

Mokokchung, Rongchii 27 (TYO): Mokokchung Police-i ayongzüka 29buba ‘National Road Safety Week 2018’ amungba den repsema ‘road safety aser traffic koda anepalutsü’ ta asüba onük nung ajemdaker police o public na sensaksem sentong tajung ka yangi Mokokchung Municipal Council (MMC) conference hall nung takok ngua kaogo.
Tanü iba sentong nung Ao Senden-i anir Watsü Mungdang, Ao Kaketshir Mungdang (AKM), Mokokchung Town Lanur Telungjem (MTLT), Mokokchung Chamber of Commerce & Industries (MCCI), All Ward Union, Taxi Association, ward yimden, Mokokchung nung tantsü-tambu aser telok balala nungi meyongertem arua tebilemba tajung aika lemsatepa liasü.
Iba sentong nung Mokokchung SDPO, Dinesh Gupta IPS-i iba sentong akaba oki laja Mokokchung police-i road safety aser traffic anepalubayim dak sendakba nung achaayanga inyakba mapa balala den ano anogo shia tebilemtsü ajurubatem indang power point ajanga lemsatepa liasü.
Paisa Mokokchung Police-i tawa tanü mapa tasen kar inyakba indang ashidang, gari lendong majurutsü asoshi tongtibang lenkoh kar nung convex mirror (aina) inoktsü, traffic island tobur junga yanglushiba, no parking zone nung anena aliba garitem nung wheel locker inoktsüba, gari aika anentettsü aser timtem melii ayutsü asoshi angular parking yangluba itemji kar lemsatep.
Sentong nung Mokokchung ADC, W. Manpai Phom-ia mapang tatsüka agidang, tanü telok balala nungi shirnokisa Mokokchung nung lenmangtem kümzüka ayuba den traffic tebilemtsü ajemdaktsütsü asoshi shisatsü tajung lemsatepogo, item ajakji bangdaki mamai tarutsü nung mapa küma inyaktsü merangtsü, ta ashi.
Road safety atema mera kaji; town nung gari mashimashi aser kanga karaa aniba ya tebilemtsü lir, anungji driving license ya mashimashi nem magütsütsü aser kanga junga mittsü nüngdaker, ta ashi. “Asenok ajak longjemer asalentong kar bushia Mokokchung ya lima tajung ka kümdaktsüdi”, ta paisa ayongzüka liasü.
Traffic anepalubayim tajungba kümdaktsütsüba ya police kisüngi masü saka senso nübur ajaki kasasa khuret süa shilem agi nung dang iba wadang ya junga azüoktettsü, ta Mokokchung Addl. S.P Relo T. Aye-ia nüburtem nem inyakdaktsünüba o ka lemsatep.