Mkg nung NLTP ACT 1989 mapa küma inyaktsü akhanger

Dimapur, November 6 (TYO): Mokokchung district nung Nagaland Liquor Total Prohibition Act 1989 mali kümogo aser ozüng amertemi yi ayokba aser ajemba mita merepranger ta Mokokchung district nung tongti teloktemi Deputy Commissioner dangi shidi ka nung züluogo.
Ozüng shitak mebenshiba aser ozüng amertemi mapa shitak meinyakba ajanga Mokokchung district nung yi ayoker jenti lir aser yi molomoshia angur. Iba ajanga lanurtem taküm raksatsür aser district nung tensa mejungi kümdaktsür, ta Ao Baptist Arogo Mungdang (ABAM), Ao Senden, Watsü Mungdang, Ao Kaketshir Mungdang (AKM), Ongpangkong Kaketshir Mungdang (OKM), Artang Baptist Arogo, Artang Ward Yimden aser Ashiponger Foundation teloktemi shidi nung shia lir.
Mokokchung district kübok dokan balala nung yi yimjak nung dang ayoker anungji onoki nü dang iba atema mapa inyaktsü mepishir, ta parnoki Mokokchung Deputy Commissioner dang ashi.
“National Highway 61 nung dokan/nija ki/hotel tem mita aotsüla. Iba dak sendakba nung, taoba mapang mita aodang yi shishilembartem masü saka yoktsürtem ang apu. Anungji, iba maparen azüoktsü atema chichiba shishilembartem aputsü onoki akhanger” ta parnokisa shidi nung shia lir.
Mokokchung nung kidang asaba yi ayokba dokantem ajak mita aotsüla aser parnok indang trade licenses agientsüla. Iba denji aibelenertem pur ozüng tapet agi merenshitsüla, ta parnokisa takhangba agütsü.
Excise aser police department temi inter-state aser inter-district check gates nung jungi mita reprangtsüla aser aibelenertem pua merenshitsüla. Yi shishilembartemi ozüng amertem den yaritepa mapa inyaker aser item jagi yi abenba garitem gate adena yoker. Anungji, ketdangsertemi iba asoshi tetuyuba agütsütsü aser aibelenertem mapa nungi anentsütsüla, ta parnokisa Deputy Commissioner dang ashi.
Maneni, Mokokchung district nung lapoka aliba liquor distillation units ajak mita orr shibangtsütsüla aser aibelenertem aputsüla. District Administration-i item onüktem agizüker, anogo tenet tsüngda mapa inyaktsü imlar, ta Executive Secretary (ABAM) Rev. Dr. Mar Atsongchanger, Ao Senden Tir Chubawati, Watsü Mungdang Tir Mrs. Maonginla, Ao Kaketshir Mungdang Tir Imkongwati, Ongpangkong Kaketshir Mungdang Tir Talitemsu Longkumer, Artang Baptist Arogo pastor Dr. Bendang Longkumer, Artang Ward Yimden Chairman Tali Longkumer aser Ashiponger Foundation President Temsumongba nungertemi sign asüba shidi nungsa shia lir.