Mkg nung Rashtriya Poshan Maah sentong agi

Dimapur, Rongjui/September 24 (TYO): Rashtriya Poshan Maah (National Nutritional month) nung shilem ka ama Mayangnokcha Govt. Higher secondary School, Mokokchung nung September 23 nü tainlonglong tetsürtem atema awareness camp ka ayongzüka katsüogo. Iba sentong ya Ongpangkong (North) ICDS project aser Department of Health & Family Welfare na longjemer ayongzüka liasü.
Poshan Maah onük nung ajemdaker jembiba mapang CDPO Ongpangkong (N) Talisangla Nokdir-i ashiba agi, iba ya Poshan Abhiyaaan kübok sentong ka lir koba India sorkari-i 2018 küm nüburtem nem holistic nourishment agütsütsü nükjidong nung amenoka liasü. Laisa, iba ya lokti dak rangloker amenokba sentong ka lir, kong stakeholder temi lokti ajangzüktsü atema inyaker, ta ashi.
Dr. Moamongla, Ayush Department, IMDH-i tetsürtem den sensaksemba mapang parnok dang Anemia tebilemtsü aser iba treatment indang lemsatep.
Urban Primary Health Centre, Yimyu, nungi Dr. Salong aser par teloki Anemia aser Diarrhea dak sendakba nung symptoms, treatment aser koda nokdangtsü iba indang osang metetdaktsü. Parnokisa, tainlonglong tetsürtem health tsütsü tebilemtsü adokba indang osang tejangja agütsü. Maneni hygienic life style atema teka shidokba jenjang tenet indang parnoki inyaka sayu.
Iba sentong ya Sr. Supervisor, Meyala lenisüba kübok aka aser Dr. Sentienla, Supervisor-i sarasademer tenzük, ta ketdangser sangdong ka ajanga metetdaktsü.