Mkg nung road safety indang shisatokden aka

Mokokchung, Aug 4 (TYO): Motor Vehicles Department, Govt of Nagaland-i “Road Safety Awareness” ta sür lenmang kümzüka ayutsü asoshi “time for action” omen nung ajemdaker shisatokden sentong ka yangi Longkumer Kilem Mokokchung nung ayongzüka liogo. Iba sentong ya Ministry of Road Transport & Highways (MoRTH) aser State Road Transport Undertakings (ASRTU) nati achayangba maparen ka lir.
Tanü iba sentong nung tongti tesemdanger Mokokchung Deputy Commissioner Wb. Sushil Kumar Patel IAS-i jembidang, India nung gari lendong kanga bulua ataloker aser iba ajanga taküm aika laludaki, anungji, iba ama sentong ayongba ajanga nüburtemi kümzükba maparen angazüktsü imlar, ta ashi.
Nagaland ya India nung gari lendong nungi kümzüka aliba state rongnung tanabuba jenjang lir, ibaji state nung lenmang kanga majungba ajanga nüburtemi gari kümdanga anitsüsa akümba agi lendong mataloker südi ta angateter, aji mesüra, ashiko lenmang tajung asünungbo koma asütsüar meshiteter, ta ashi.
Tanü Nagaland nung garitem ya insurance mali teimba, gari tasen alidang compulsory küm ka atema yangluba dak alaka taruba küm nungibo aikati meyanglur, insurance yangluba ya asenok tajangzük atema lir, anungji, ajaki ibai tongtibang ta angateta yanglutsü asoshi paisa ajungshia liasü.
Tanü gari anir aikati gari kanga kara (speed) anitsü meranger, gari kara anirtem ang driver tajung ama bilemer, saka ibaji masü, ajaki gari nung mena alir passenger anisüngzük atema bilemaa anitsü tim, ta paisa inyakdaktsünüba o ka ashi. Gari kümdanga aniba ajanga garia meraksar aser gari anepaluba nunga sen aika kümzüker, ta paisa shisem.
Gari anirtemi lendong balala nungi kümzüktsü atema yi jemer gari manitsüla, gari tanidak nung phone amshiba/jembiba yimya ya anentsüla, ta ashi. Gari akar ajaki pei gari nung yirudang anepalutsü atema ‘First Aid Box’ indoker senzütsü asoshi paisa shisem.
Gari anir shia koba tesem nung speed limit asütsü tim, itemji meteta anishitsüla aser khu abenba garitemia osettemji talila mabentsüla, kechiyong oset tali abenba ajanga apu aser gari lenmang raksatsür, ta paisa temetettsü kar lemsatep.
Kasa sentong nung mezüng shisalen sayur Wb. M.B Longkumeri senso shiai khuret meteta lenmang kümzüka ayuba (Road Safety: Awareness and responsibilities of a citizen) onük nung tagitsü o aika ashi aser tanabuba shisalen sayur Mokokchung Addl. S.P Yanren Ngullie-i Traffice ozüng nung jembidang ozüng amshiyim aser aibelenertem nem kobayimi merenshir itemji tatongi rateta tekümdangtsü o aika shia liasü.
Sentong nung Nagaland Transport Commissioner Wb. Elias T Lotha-i iba shisatokden akaba nükjidong lemsatep. Road Safety Awareness sentong ya state nung yaküm Dec ita 5 nü tenzük aser iba ya küm piyong agiyonga aotsüba maparen ka lir.
Tanü sentong nung Mokokchung Town Baptist Arogo Pastor Rev. Ponen Lcr den temoatsü meshia sarasademer tenzük aser sentong nung Mokokchung district kübok riju balala nungi kaketshirtem densema office aser mulungtet telok balala nungi tenzükertem arua shilem agia aden.