Mkg nung Rotavirus vaccine benokba training agütsü

Dimapur, Aami/June 17 (TYO): Rotavirus ajanga tanurtem dang diarrhoeal tashidak balala agi tongdaktsür aser kinü tanur arishi küm pongu tashi nung iba ajanga khenbosa kongshir. Iba tashidak nokdangtsü atema rotavirus vaccine ta nüngja agütsür vaccine tasen ka tang mezüngbuba July 2019 nungi tenzüka routine immunization schedule nung benoka agütsütsü. Linük nung iba vaccine agütsüba state rongnung Nagaland 12buba aser North East nung state 3buba asütsü.
DPMU, CMO office sangdong ka ajanga ashiba agi, IDSP conference hall, IMDH Mokokchung nung June 12 nü nungi 14 nü tashi iba dak sendakba nung anogo asem District level training training ka trainer tem nem agütsüogo.
Training agütsüba sentong nung Dr Chubala Aier CMO, Mokokchung-i lokti pelaa agizükba o jembi, kong lai sentong nung shilem agirtem dang tesayuba balala kanga junga angazüktsü atema kanga nendaka angazüktsü ajungshi.
Dr Kibangkumba-i sentong nung shilem agirtem dang pelaba lemsatep aser paisa iba vaccine koda tongtibang iba indang lemsatepa liasü. Paisa parnok dang pei tata health units tem nung iba inyakyim shidak benoka benshitsü ajungshi. Directorate of Health and Family Welfare, Kohima nungi monitoring aser supervising team ka iba sentong nung arua aden.
Training nung shisalen agütsürtemji Dr Ayangla Saku DPO(UIP&RCH), Dr Limanaro aser Dr Imtimmongba nunger liasü.
Training nungsa Medical officer, ANM , Health worker aser NHM staff tem dena liasü, ta ketdangser sangdong ka ajanga metetdaktsü.