Mkg nung rum bottle 414 aser beer case 4 apu

Mokokchung, Sept 1 (TYO): Mokokchung Police Special Operation Team (SOT)-i August 31, 2017 nü Kohima lenmang Ari yim aoba lenjem nung mita ataba mapang nikongdang 3:00 ako meta gypsy gari ana nung yi pongdang (IMFL M.C rum) 414, Beer case 3 (bottle), can beer case 1 puogo, ta police osang ka ajanga jangjaogo.
Gypsy gari sentsü temesüng (NL. 01 H -3887) aser ano gypsy gari temesüngsa ka (NL. 03-1495) nung item ozüngi memelaba temesepba chiyungtsütemji bener lia apu. Gari ka nung rum pongdang 116 aser ka nungji rum bottle 298 den beer case pezüji inoker liasü, ta police osang ajanga metetdaktsü.
Iba maparen dak sendakba nung police-i Angangba yimer Mr. Thonghoyu (55) S/o Mr. Ongto aser Sangsomong yimer Mr. Khingkho (56) S/o Mr. Ranglongse na pua lir. Iba dak sendakba nung Case No. 11/2017/US 44 NLTP Act kübok okadak case register süogo, ta PS II Officer Incharge Wb. Imkongtoshi Jamiri osangbenertem den jembidang metetdaktsü.
Iba apuba maparen dak sendakba nung Co-op, Relief & Rehabilitation, MARCOFED Minister, Wb. Imtilemba Sangtam nikongdang 5:30 ako meta Mokokchung police station II-i arua police dang item temesepba chiyungtsüji chioktsü asüngdang, saka police-i mechiok, ta osang ajanga angazüker.
Taküm 2017 nung Mokokchung PS II kübok ozüngi memelaba temesepba yi shibelenba (NLTP) aser ibala mesükba keno dak sendakba nung case 6 tashi register süogo, ta police osang ajanga metetdaktsü. Nagaland nung yi nokdangtsü asoshi NLTP Act yanglua liakasa, Naga lima iba ama yi shibelenba mapa maneni ataloker.