Mkg nung school tejentiba rongnung tanabuba N.I Jamir GHSS temeimtsü tia nung lir

Nüngdakba aika meliaka result bo tajungba tajungba kümdagi

Mokokchung, May 8 (TYO): 1964 küm tenzükba N.I Jamir Govt. Higher Secondary School Ongpangkong ya Mokokchung nung school tejentiba rongnung tanabuba lir. Aji saka, temeimtsüka school ki nungi tenzüker tzü, light aser tongtibang nüngdakbatem agi anünga aliba angur.
Iba school ya taoba Nagaland Chief Secretary aser minister, asür N.I Jamir nüngtem lapokba lir aser ibai Yimyu ward nung alirtem atema dang masü saka temeket yimtsüngtem asoshia kanga tongtibang school rongnung ka lir.
Nüngdakbatem abensaa meliaka, kümshi iba school-i result tajungba-tajungba agütsüdaki, taküm balaka class 12 pur mezüng batch parnok 8 agütsüba ajak takok nguogo, aser class 10 pura parnok 14 nungi 11 takok angu aser takoker rongnung subject balala nung distinction angurtem densema liasü, ta NI Jamir GHSS Principal, Temsürenla Longchar-i osangzülurtem den sensaksemdang ashi.
Tang aliba school ki ya 1980 küm yangluba lir, iba sülen iba school ki ya sorkar nungi senotsü teyari arua khen danga yanglushia mali. Anungji, “kilem nungi tzü asener, kijiba kata junga mali, süngküm tongnü teimba shizüka ogo aser artsü mali”, ta laisa timtem aliba kar lemsatep.
School tenzüker 2014 küm to hon jubilee mungogo. Jubilee mapang sorkar nungi senotsü teyari kecha maruaka tesayurtem ita ishika sen saruteper school ki tera yanglushiogo. Ano school dak sentakba teyanglushitsü aika alinung ano maneni tesayurtem, nüburtem aser temulungetemi tenla balala agüja tanü tashi yanglushiba maparen maneni inyakdaki, ta laisa shisem.
School ya tera tezü ka nung asünung, kaketshirtem school-i arutsü timtem ajurur, oli oratsü (transportation) timtem aliba ajanga kaketshir nütsüng (school enrolment)-a merenloker. Iba dak sentakba nung school bangdaki transportation atema lenmang kar bushitsü merang saka ibaji anepalu mesütet, ta laisa ashi.
Anungji, “yangi azüngertem mapang shitak nung school-i arua sademsadema education angutsü asoshi school bus ka kanga nüngdaker, aser iba ajanga school enrolment-a renloktsü imlar”, ta laisa tang rongdak nüngdakba ka lemsatep.
Ano yangi school jara/atsü mali, iba yongji aiür asangurtem school kilem/anameta arua kazütepba aser school ki raksatsüba osang lir, iba den ano atsü junga mali asünung ali atsünga aruba tebilemtsüa lir, ta laisa ashi.
N.I Jamir GHSS Management Board nung mendenbula, EAC Livitoli Sukhalo-i ashiba agi, 2015 küm District Planning & Development Board (DPDB) nung iba school nung nüngdakba tebilemtsü ajuruba indang ya shiogo saka tanü tashi kecha telangzüba mangur, ta metetdaktsü.
Iba school ya 2014 nungang Higher Secondary level jenjang ajungketa arts stream nung class 12 tashi lapokogo. Jangratemtsü kaji, taküm class 12 mezüng batch pur par 8-i HSSLC tatidang agütsüba nungi parnok ajaki takok nguogo.