Mkg nung school-tem rongnung “Ao spelling bee” tetoktepba akar

Mkg nung school-tem rongnung “Ao spelling bee” tetoktepba akar

Mokokchung nung mezüngbuba Inter-School Ao zülumen tetoktepba (spelling bee) nung shilem agirtem külemi tangokba noksa nung angur. Mokokchung, July 29, 2016.  

Mokokchung, July 29 (TYO): Lenjeter Kohima aser Department of Linguistic Nagaland University, Kohima nati achayanga Mokokchung nung mezüngbuba Inter-School Ao zülumen (spelling bee) tetoktepba sentong ka Hogulbarnü yangi Mokokchung Cosmos Hall nung ayongzüka kadaki.Mkg nung school-tem rongnung “Ao spelling bee” tetoktepba akar
Mokokchung, July 29 (TYO): Lenjeter Kohima aser Department of Linguistic Nagaland University, Kohima nati achayanga Mokokchung nung mezüngbuba Inter-School Ao zülumen (spelling bee) tetoktepba sentong ka Hogulbarnü yangi Mokokchung Cosmos Hall nung ayongzüka kadaki.
Iba tetoktepba nung Mokokchung town aser temeküt nungi school 13 (Pvt. and Govt.) nungi parnok 35-i shilem agidaki.
Iba sentong ya tongtibangsa Ao kaketkeno aser oshioben renlokdaktsüba den külemi Ao zülumen liromedemtsü nükjidong yur ayongzüker, ta Lenjeter Magazine Editor, Repalemzüngi metetdaktsü.
Iba sentong katettsüsa Parliamentary Secretary for Geology & Mining Dr. Imtiwapang Aieri teyari tulu agütsüba asoshi tayongertemisa pelaba metetdaktsü.
Iba tetoktepba nung tedendangertemji; S.Wati Ozüküm, Imtipokyim, Toshisangla par asem lir. Department of Linguistic N.U Kohima nungia tesayur Dr. Pangersenla aser Dr. Imlienla Imchen na arua shilem agia dendaki.
Mezüng nü tetokteper rongnung preliminary stage agia top 20 shimtet aser top 20 rongnung top 10 shimtetogo. Tana nü (Day-II) Top 10 rongnung quarter final-i nisung pungu (5) aitsü, semi final-i nisung asem (3) aitsü aser final nung nisung ana (2) toktepa tajungtiba ka shimtettsü ta, tayongertemisa metetdaktsü. Takoker nem senpet tajung renemja lir, ta angazüker.
July 30 nü senpet agütsüba mapang alitsü aser iba sentong nung Ao Baptisr Arogo Mungdang (ABAM), executive secretary, Rev. Dr. Mar Atsongchangeri tajungshi o jembitsü jaoka lir. Lenjeter Magazine teloki Ao oshi agir kar nem scholarship agütsütsü asoshi shima lir, ibajia asüng iba sentong nung agütsütsü ta sangdongogo.
Ao zülumen dak sentakba nung school-tem rongnung “spelling bee” tetoktepba akaba ya mezüngbuba asütsü aser Ao kaketkeno aser oshioben renlokba wadang nung ibai tapak tasen ka asütsü. Iba ajanga lanurtemi pei tetsü oshi tali sapua jembitsü, azüngtsü aser zülutsü imlar, aji oda, ibai maneni ayonga akatsüla, ta iba osangbeneri Ao Senden Literature Board (ASLB) züngsem ka den jembidang pai ashi.

You must be logged in to post a comment Login