Mkg nung sorkar mapa inyaker Group B & C training tenzükogo

Mokokchung, April 03 (TYO): Department of Personel & Training, Government of India-i sponsor süa aser Administrative Training Institute, Kohima den District Administration, Mokokchung-i ayongzüka April 3, 2017 nü Commissioner’s Guest House, Mokokchung nung Mokokchung district kübok tang tasen shimba sorkar mapa inyaker group B aser C atema hopta ana Induction Training Programme tenzükogo.
Iba sentong nung tetushi tejaoker o jembidang Secretary to the Govt. of Nagaland & Director ATI, Lithrongla G. Chishi IAS-i, sorkar mapa nung group “B & C” employees ji kanga tongtibang lir, kechiyong parnoki nüburtem den tongtepa inyaker, ta ashi.
Lai training agirtem dang iba training nung temelung aguja adentsü aser inyakyim nung temelesnhi bener arutsütsü asoshi ayongzük.
Lai ashiba agi, capacity building aser sorkar inyakyim tajungba akumtsü atema technical mapa inyakertem densema sorkar mapa inyakertemi training agitsü nüngdak.
Laisa, “Sorkar mapa inyaker ka ama, asenok ya itasen aazüker ka dang masü saka nüburtem kilir lir ta rajemtsüla. Asenoki asenok ya kilirtem lir ta angatetra asenoki asen mapa nendaka khuret bena inyaktsü,” ta ashi.
Mokokchung Deputy Commissioner, Sushil Kumar Patel, IAS-i lokti pelaa agizük aser ADC & Nodal Officer, ITP Mokokchung District, Sachin Jaiswal IAS-i okila jembia liasü.
Iba sentong ya SDO (C), Lemlila T. Sangtam leniba nung agi.