Mkg nung Swachhgrahis-tem atema training katsü

Mokokchung, Rongjui/Sept. 24 (TYO): Mokokchung PHED-i ‘Swachhata Hi Seva’ sentong kübok Swachhagrahis (motivators) tem atema training ka yangi Longkumer Kilem Mokokchung nung ayongzüka katsüogo. Iba sentong nung yimtsüng 63 nungi shilem agirtem Swachhagrahis aser WATSAN züngsem noklang ka dak tali adenshia shilem agia denogo.
Tanü iba sentong nung Mokokchung PHED, Executive Engineer, N. Yanger Pongen-i jembidang, linük ka tejakleni aotsübaji merükmejuba nungi züngoka tenzüker, anungji nüburtemi sorkar nükjidong angateta ajaki shilem tajung agitsü asoshi ayongzüka liasü.
Merükmejuba wadang ya jembitsübo temela saka inyaka aotsü tasak, aji saka, “tangari koker asenoki makoktsüba masü”, ta paisa ajungshia liasü.
Iba mission ya tulu saka taa kecha mali, ibai angati nübu tenlaba maparen ka dang lir. Aji oda, ajaki tangatetba tajung nung khuret süa pei yimtsüngtem nung meranga inyakdaktsünür, ta paisa ashi.
“Merükmejuba ya asenok asoshi yimya aser sobaliba ka kümdaktsütsüla aser iba atemaji asenok mulungsentsü melenshitsü nüngdaker”, ta paisa ayongzüksem.
Tanü iba sentong nung SDO Imtiyanger aser SDO Masachuba Ozüküm nati ‘Swachhata Hi Seva’ mapatong dak aketba meteta alitsü atema aser teinyaktsütem aika bener arua lemsatep. “Swachhagrahi ke Swachhagrahi: Ek Se Anek” onük nung Sanitation Hygiene Consultant, Tsüngrusungla Jamir-i jembia liasü.