Mkg nung TDCC printing and publishing house amenokogo

Mokokchung, Luroi/August 23 (TYO): Mokokchung aser kidanger district-tem atema osang tajung kaji, Mokokchung nung mezüngbuba otsüsütsüsa kaket menünga adokdak printing and publishing house tenüng agi ‘Tribal Development and Communication Centre (TDCC)’ ta sür ka lapokogo. Iba TDCC ya Mokokchung NNC office anasa lir.
Yangtepnü TDCC lapokja Mokokchung Addl. Deputy Commissioner, W. Manpai Phom-i jembidang, Mokokchung nung kaket menünga adokdak/adoktsür (printing and publishing house) amenoktetba asoshi TDCC telok aser printing kibur nem tenüngsang agütsüba den iba ya ajanga Mokokchung nüburtem dang masü saka Nagaland state songjen nung nüngdakba aika ajangzüktsü imlar, ta ashi.
Züluba inyakyim ya asenok asoshibo mapa tasen ka lir, Naga nungerji tebang aser mulungzüng agi dang kechisarena belentepa aruba kin lir, iyongji asen sobaliba tajung aser yimsüyimpong aika tokshia aser samaa aruogo, aji oda, tanü iba TDCC amenokba ajanga itemji wazüka aser kümzüka ayutsü imlar, ta paisa shisem.
Tongtibangsa iba TDCC printing and publishing house lapokba ajanga liso kaket zülur aika adoktsü imlar, ta paisa moaja ashi.
ADC W. Manpai Phom-isa L. Imsütoshi Jamir aser Zülunungsang Lemtur nati English nung züluba “Tribal Cultural Imagination and theological conversations” ta sür kaket ka dena sayatsü. Iba kaket ya züngabo TDCC ajanga kaket 40 buba menüng adoker asütsü aser ano ita ka ana tsüngda kaket kar adoktsü, ta osang ajanga angazüker.
Iba printing and publishing house meshiteta Mokokchung Town Baptist Arogo (MTBA), pastor, Rev. Ponen Longchar-i sarasademtsü. Sentong nung Ao Baptist Arogo Mungdang (ABAM), executive secretary, Rev. Dr. Mar Atsongchangeri TDCC indang rajem o ashi. Publishing house kibur Meren Imsong-i tepela o lemsatep.
TDCC ya 1994 küm nisung ishika longjemer tongtibangsa tribal shisashir luyim balala nung shisatsü tarok bushirtem nem sabang lapokja ajungshiba den parnok mapatemji national aser international level tashi tongdaktsütsü nükjidong yur tentetba lir, ta angazüker. Temalen kaket adokbatemji TDCC printing partner-tem nung menüngba lir.