Mkg nung teintet rogotem anogo amung

Mokokchung, October 01 (TYO): Alima den tsüngkang medema Brihostibar nü Ongpangkong Salang, Mokokchung town nunga ‘International Day of Older Person’ mungogo.
District Welfare Office aser Day Care Centre for Elderly Persons, Mokokchung nati senteper “Sustainability and Age Inclusiveness in Urban Environment” omen nung ayongzükba sentong nung senso tain 70 dak tema dena liasü.
Iba sentong nung jembidang Mokokchung Deputy Commissioner, Sushil Kumar Patel-i, IDOP anogomung amungtsü ya 1990 küm United Nations General Assembly nung lemteta liasü aser mezüngbuba IDOP anogomung 1991 küm amung, ta ashi.
“Pei mapa nungi anisüngzüker aliyonga nenoki aika ajangshia arur asünungji nenoki lokti nem tajangzük lenmang aisülen nungi agütsütettsü,” ta pai senso taintem ayongzük.
Kasa sentong nung senso tainten tenüng nung jembidang Mokokchung District Pensioners Association Tir, IB Meren-i külem senso taintemi Day Care Centre for Elderly Persons-i arua temang tendangba densema teyari balala agitsüla, ta ashi.
Tesasaba olen ka nung pai, Day care centre nung facility aika lir, ajisüaka senso taintem aikati item teyari magir, ta ashi.
“Ajaki item teyari balala agiba den külemi Centre lapokba anogotem (Hombar, Mongolbar aser Hokolbar) nung Centre semdangra Centre-i revival ama sentong balala ayongzüka katettsü,” ta paisa shisem.
Tanü iba anogomung nung District Welfare Office, Mokokchung-i senso tain ana- Mongsenyimti tsür, Watsü L Opangla aser Ungma nunger, Wabong N Talitemjen Jamir na nem award agütsüogo.
MTBA Associate Pastor, P. Toshi Pongen-i senso taintem atema sarasademtsü.
Day Care Centre for Elderly Persons BOD züngsem, Dr. Imlirenla Walling lenisüba nung agiba sentong nung CDPO Mangkolemba Imliyanger-i lokti pela agizük aser CDPO Ongpangkong (North), Talisangla Nokdir-i anküp tepela o jembia liasü.