Mkg nung TOT-tem nem CFR refresher course agütsü

Miss Mokokchung Sunepmenla-i alima lendong atalokdang teinyaktsü kar sayudang tangokba noksa nung angur. Mokokchung, June 15, 2017.

Mokokchung, June 15 (TYO): Nagaland State Disaster Management Authority-i nungita Home Guard & Civil Defence den külem sür District Disaster Management Authority (DDMA) Mokokchung-i ayongzüka anogo ka Training of Trainers (TOT)-tem atema ‘Community First Responder (CFR)’ indang tanaben angazükshiba sentong ka yangi Mokokchung Town Hall nung kaogo. Iba sentong nung Mokokchung district kübok TOT 35 shi dena liasü.
D.G Jail & HG Rupin Sharma IPS-i iba sentong tenzükja jembidang, India lima CFR training ya Nagaland nung mezüngbuba tenzükbaji jangratemtsüka lir aser Nagaland ama lenmang junga maliba state ka nung iba training angazükba ajanga lendongtsüdong balala atalokdang junga langzütettsü imlar, ta ashi.
Training balala agiba ajanga dang asenoki shisatsü aika angazükteter aser ano angazükshir. Ibai lendong anema inyakba maparen ka asünung, nisung ajaki kanga junga aser nendaka angazüktsüla, ta paisa inyakdaktsünüba o ka ashi. “Nenoki kechi angazük ibaji nübur dang sayutsüla aser lemsateptsüla”, ta paisa shisem.
Ajungben lendong balala atalokdang kechi inyaktsü aser koma langzütsü ta teti renema atatsübaji kanga tongtibang lir, kechiyong lendongji koba mapang nung arutsüar shingaia meshitet, ta paisa ashi.
Lendong tapu balala indang osang perokshitsü atema state, district aser sub-division level nung WhatsApp group lapoka tawa tanü atalokba osangtem yakyakta lemsateptsü asoshi paisa ajungshia liasü.
Tanü refresher course nung adener TOT-tem yagi Mokokchung district kübok sub-division 7 nung CFR training agütsütsü. Iba training-ji June 19 nungi 23 tashi agitsü. Mezüngren nung sub-division shia nungi yim/ward pezü nungi nisung 10 nem iba training ya agütsütsü aser meilongi tangatemji agia aotsü, ta Mokokchung DDMA Officer T.Wangshi Jamiri metetdaktsü. CFR training ya akokba tashi yimdak yimtsüng tashi nung angazükdaktsütsü onok nükjidong lir, ta paisa shisem.
Tanü kasa sentong nung Miss Mokokchung Kr. Sunepmenla, shiba DDMA Mokokchung Brand Ambassador lir, laia shilem agia CFR indang okila ashiba den lendong balala atalokdang meteta alitsü asoshi teinyaktsü aser anepaluyim kar sayua liasü.