Mkg nung Tsüngremmung Hornbill Festival tenzükogo

Mokokchung, Aug 1 (TYO): Aug 1 nü Nagaland Deputy Chief Minister, Y. Patton-i “Celebrating our roots” omen dak rangloker akaba ‘Tsüngremmung Hornbill Festival Mokokchung 2018’ benjung yangi Aor yimtiba Mokokchung town Imkongmeren Sports Complex nung meraketa tenzüktsüogo.
Sentong metenzükdang nungi mepet sübanger tsünglu tanen makai aruba ajanga moapu sünga lishi aser motzü agi shilem agirtem aser benjungmungertem mesademi liasü, aji saka, renema akaba sentongtembo ajak takok ngua agia liasü.
Y. Patton-i iba benjung lapokja jembidang, mini-hornbill agitsüba ya April 16, 2018 nü cabinet senden amendang renem aser PDA sorkari iba ya tongtibangsa district ajak nung lima penzürtem arudaktsütsü nükjidong yur Naga nunger kin balala inti benjung den repsema agitsü lemtet, ta metetdaktsü.
Iba mini-hornbill festival ya Nagaland nung aliba Naga nunger ajak nem sakuku maongka lapokja talisa entrepreneurs-tem jenjang ajungkettsüba den kin balala sobaliba senmangtem wazüka ayutsü aser lenmang aisü nung tajangzük kadaktsütsü nükla yur inyakba maparen ka lir, ta paisa ashi.
Mini-hornbill sentong ajanga kidanger district aser state balala tsüngda tesentaktep tajung yangluba den sobaliba balala angazükteptsü maongka lapoktsütsü teimla lir. Anungji, mini-hornbill amungba ya amajok nung mapang, tashi aser rongsen lalurba masü saka PDA sorkari mangdang tulu yur inyakba maparen ka ta angateta ajaki shilem agitsü ajungshir, ta paisa ayongzük.
Nagaland sorkari Mokokchung district ya mezüngpur “Land of pioneers” ta nüngja agütsübaji kanga tapet, kechiaser Khrista yimsü, education, music aser ano lenla aika nung nenok ya mezüngpur lir aser Aori Naga nunger tejakleni aniba nung shilem tulu agia kar, atangchi nung, Naga nungeri Ao kin dang nungi tangazüktsü aika lir, ta paisa Aor nem tenüngsang agütsü. Maneni tarutsü nunga Ao kini state yimsüsüba nunga lenisüba tajung agütsütsü imlar, ta paisa shisem.
Ao kini asen lokti asoshi tongtibang mapa inyakba rongnung Ao Kaketshir Mungdang-i yakbang süa inyakba “Survival Mokokchung” tenzükba ya otsüsütsü ka asütsü, iba ya ajanga asen liso nisungtem lenmang aisü nung tajangzük nguogo, tanga district-temia iba kasa mapa ya tenzüktsüla, ta paisa ayongzüka ashi.
Assam sorkari National Register of Citizen (NRC) adokba ajanga ozüngi memelaba nisungtemji kidanger state-tem nung nungpoka aittsü ana nung lir, ibaji kanga junga mittsü atema state sorkaria arü sangokja maparen balala inyakdar, saka sorkar kisüngibo iba mapa ya takok mungutettsü, anungji, nüburtem nungi amalitep aser teyaritep nüngdaker, ta paisa inyakdaktsünüba o ka ashi.
Tsüngremmung benjung ya temoatsü balala asoshi tenüngsang agütsüba den iba mapang kija aser lokti asüngteta amungba ama, Tsüngremmung nung dang masü saka anogoshi asen taküm nung iba ya reta benshitsü asoshi paisa tayongzükba ka agüja pa o tembang. Tetushi tejaoker Y. Patton-isa maongka agia Tsüngremmung Hornbill Festival stall lapoktsü.
Sentong nung Watsü Mungdang tir Maonginlai tarurtem ajak pela agizük aser Higher Education & Technical Education Minister, Temjen Imna Along-i Tsüngremmung salem o lemsatep. Sentong nung kentenmenü, yar tsüngsang aser tetoktepba tapu balala agia liasü.