Mkg nung UPSC & NPSC civil service aser tatidang balala atema coaching centre ka lapokogo

R.D Minister, Metsübo Jamir-i Growth Centre Mokokchung tenzüktsüba sentong nung jembidang tangokba noksa nung angur. Mokokchung, August 16, 2019.

Mokokchung, August 16 (TYO): Mokokchung nüburtem atema kanga dang nüngdaka aliba UPSC, NPSC civil services aser tatidang tapu balala renemshidak “Growth Centre Mokokchung” ta sür ka Nagaland R.D Minister, Wb. Metsübo Jamiri tenzüktsüogo.
Iba centre tenzüktsüba sentong ka yangi Eden Academy, Kumlong Ward Mokokchung nung alidang, Aorji tokolokbo lir saka facilities maliba ajanga tejakleni onüseta mouteti langtsüngleni aoba angur, ta Metsüboi temulung shiranga ashi.
Tsüngremi asenok nem lenisüba sempet agüja lir, Aorji ajak nung liteteba kin ka lir, anungji, tajungba akümtsü merangtsüla, ta pai ashi. Aor Aotsür aikadi Kohima aser Dimapur nung dang linür, iyongji Mokokchung atema bilemtsü melena tanga atema dang bilemer, ta paisa shisem.
India limai or coaching agitsübaji temela masü aser rongsen jenti intoker, anungji, iba centre yangi amenokba ajanga mapang aser rongsen jenti kümzüktsü, anungji, asen chirnurtem yangi coaching agitsü ajungshiteptsüla, ta paisa ashi.
Iba centre ya Mokokchung nüburtem atema lir, anungji, iba ya temoatsü süa amshidaktsünür, ta paisa ajungshia liasü. “Ni election-i aibaji nübur nungi langka meshitsü atema masü saka nübur nem agütsütsü atema aiba lir”, ta paisa shisem.
Osang tajung kaji; Growth Centre Mokokchung nung India nung IAS coaching network tulutiba ALS IAS ajanga civil service tatidang tapu balala atema ita 11 course ka agütsütsü aser ibaji tan August ita nungi tenzüktsü. Iba course atema ya shitakba agibo fee ji sen 1.8 lakh agir, saka discount sür full course atema 82,600/- dang agitsü, ta Growth Centre Mokokchung, coordinator, Imtiakumi ashi.
Iba ALS IAS course dak sentakba nung Aug 17, 2019 nü scholarship atema tatidang ka agitsü aser iba tatidang nung top 50 shimtettsü aser item top 50 nung takok angur nem parnoki anguba marks percentage apir course fee-ji 82,600/- nungia tajemba agitsü, ta paisa shisem. Iba course yabo pei aginüba mapang – anepdang, anüngdang, nikongdang mesüra weekend nunga agitettsü akoktsü.
Iba den külemi Growth Centre kübok “Vidyamandir Classes” ta sür JEE, NEET aser NSEE tatidangtem atema ita 10 atema course ka experimental class ka yaküm 2018 November ita nungi tenzüka odar. Iba coaching agitsü atema shitakba course fee-ji 1.2 lakh agir saka discount nung 30,000/- dang agir. Yaküm batch nung nisung 8-i tatidang balala nung takok ngur parnokji tang tezüngdak lir. Course fee 30,000/- ji koda masürtem atema ita shia lemdanger agütsütettsü, ta coordinator-isa ashi.
Iba centre ya Arkong Ward, Mokokchung HDFC Bank anasa amenoka lir. Iba dak sentakba nung osang tejangja metetnüra 7005589446 nung tongtepratep agitettsü. Iba centre ya Minister Metsübo Jamir par kibongi Mokokchung nüburtem shisaliok tsütsü tejakleni aotsü nükjidong tulu yur bener aruba lir.
Iba sentong nung Ao Senden, Ao Kaketshir Mungdang, Watsü Mungdang nungi meyongertem arua o tatsütsü jembi. Kumlong Baptist Arogo pastor Rev. Lima den temoatsü meshia sarasademtsü.