Mkg nung walkaton den ICS tenzükba sentong agi

Mokokchung, Rongjui/September 25, 2019: Bodhbarnü Mokokchung jila nung walkhaton nung shilem agirtem tangokba noksa nung angur.

Mokokchung, Rongjui Sept. 25 (TYO): Walkathon den repsema Integrated Community Sensitization aser BSI Drive den Health Screening Camp sentong ka September 25, 2019 nü Mokokchung nung ayongzüka agiogo, ta ketdangsertem osang ka ajanga metetdaktsü.
Iba sentong nung tetushi tejaoker Mokokchung Deputy Commissioner, Rajesh Soundararajan-i Imlong Place nungi walkathon tenzüktsü aser IMDH Mokokchung nung ICS den BSI drive aser Health Screening Camp tenzükja liasü.
Sentong nung Ayushman Bharat (AB) – Pradhan Mantri Jan Arogya Yojana (PMJAY) nungi tajangzük angurtem- Kubza yimdak nungi Imliyangba aser Longsa yimdak nungi Kilensungla nati PMJAY scheme ajanga tajangzük anguba lemsatep.
Best performing Pradhan Mantri Arogya Mitra (PMAM), Yapanglemla Imchen-i beneficiaries timtiba enroll asüba atema la nem tetushi agütsü.
(Nodal Officer) AB-PMJAY, IMDH Dr. Sentirenla R Jamir-i AB-PMJAY Awareness indang jembi aser Dy. CMO-cum-District Nodal Officer AB-PMJAY, Dr. Kibangkumba-i tepela anküp o jembia liasü.
Sentong tetenzüklen Chaplain IMDH, R. Nchumthung Humtsoe-i sarasadem aser (MS) IMDH, Dr. P. Medemmayang-i lokti pelaa agizükba o jembia liasü.
Iba sentong ya Chief Medical Officer, Mokokchung, Dr. R. Chubala Aier leniba nung agi.