Mkg nung ward-tem rongnung beat contest ali ; Alempang Ward pur tajungtiba liasü

1buba Mokokchung town Inter ward beat contest takoker, Alempang Ward pur den tedendanger aser tayongertem külemi tangokba noksa nung angur.

Mokokchung, December 17 (TYO): Temulunger Telok-i “Music a life, a soul to everything” omen nung ajemdaker mezüngbuba Mokokchung town Inter-ward beat contest sentong ka Honibar aonung yangi Mokokchung town hall nung ayongzüka liogo.
Taküm iba kenten tetoktepba nung Mokokchung town kübok ward 9 nungi band 9-i shilem agia liasü aser item rongnung Alempang Ward puri mezüngbuba jenjang ngua parnoki 1st Mokokchung Town Inter-Ward Beat Contest 2016 trophy benogo.
Sangtemla Ward pur tanabuba jenjang nung liasü. Takoker nem senpet den kuli kaket agütsü.
Iba den ano nija sempet; Best Vocalist-Taliyanger Lemtur (Alempang), Best Guitarist- Pangjung (Alempang), Best Bassist- Imnajungla (Alempang) aser Best Drummer- Imlitoshi (Salangtem) nungertem shimteta parnok nema senpet den kuli kaket agütsü.
Iba beat contest ya 1980’s mapang rock music nungi tetendangba agia liasü. Temenungratsüka shilem agirtemi Deep Purple, Twisted Sister, Ozzy Osbourne, Poison, Dio, AC/DC aser 80’s mapang nüngtugu band-temi atenba kentem atenba ajanga tesentepertem tzüratemdakja liasü.
1980’s rock music ajanga Mokokchung nung lanurtem aika puadakja kentener aser musician aika adokba ajanga iba beat contest ya 80’s rock dak rangloker ayonga liasü. Iba beat contest ya kümshi akaba sentong ka südaktsütsü tayongertem nükjidong lir.
Sentong nung tongti tesemdanger taoba Addl. Development Commissioner Dr. Temsüwati-i mapang tatsüka agia jembidang, Mokokchung ya tetenzüker lima (land of pioneers) ka dang masü saka tanishir lima (land of leaders) ka südaktsütsü asoshi tayongzükba ka agütsü.
Tanishir lima ka akümtsü asoshi, koba mapa nung südir süaka, pei inyakba mapa nung lenir asütsüla aser lenir ka asütsü atemaji tanidaker tajung ka asütsü tim, ta pai inyakdaktsünüba olen ka ashi. Paisa iba dak sendakba nung ashidang, lenir ka dakji mangdang akaba den bendanga agütsüba, meranga inyakba, tenendak aser tazüokba alitsü nüngdaker.
Takoker ka akümtsü asoshi mezüngbuba pei sempet bushiteta iba nungji mongin akümtsü merangtsü paisa ajungshia liasü.
Mokokchung district ya shisatsü tasen poktetdak aser lenla ajak nung tatishitsü tajung sayuba district ka kümdaktsütsü asoshi paisa ayongzük.
Iba aonung tedendangertemji; Lanuaküm, L. Alemtemsü aser Tangit Imsong nunger liasü. Sentong nung Four of Us ta sür telok kati 80’s rock ken kar atenba ajanga iba beat contest tali meraketdaktsü.