Mkg nung “World Day Against Trafficking in Persons” sentong agi

Dimapur, Chiteni/July 30 (TYO): SAKHI-One Stop Centre Mokokchung aser Nagaland Police DEF Mokokchung na longjemer “World Day Against Trafficking in Persons” anogo mungogo. Iba sentong ya “You can free me” omen nung ajemdaker July 30 nü New reserve DEF, Mokokchung agia liasü.
Iba sentong ya asen lokti nung tetsür aser tanurtem anema Human Trafficking maparen balala inyakba anema nokdaktsü nükjidong nung ayongzük aser iba den ano nuburtem dang item tebilemtsü anema nokdaktsü ajugnshitsü nükjidong yur sentong ayong, ta Y. Tumchobemo Yanthan NPS Add. S.P, Nodal Officer of Sakhi-OSC, Mkg-i ashi.
Sentong nung tongti o jembirji Center Administrator Sakhi-OSC Wangshinaro Yaden aser Panel Lawyer MDLSA Moatemjen na liasü.
Wangshinaro-i “Modern Day slavery – Human trafficking” indang rasaa ashi aser ashiba agi, Nagaland ya arrtsü nung lir kong trafficking kanga bulua ataloker. Trafficking sang nung ashirtem ya arishi küm 12 tsüngda nung alirtem asür aser shilem 80 bo tetsür asür, shirnok tashiyim agi tekep ayokba aser pornography nung shilem agidaktsür. Nisung shibelener aoertem shilem 1 bo kümzüker aser item nisungtem ya shi aser tanüla nung kanga mejungi timtem ajurur alirtem alir. Yaden-isa police tem dang kümküma alitsü ajungshi kechiyong parnok kümküma lira jenjang tapet agitettsü.
Kasa mapang nung Moatemjen-i SUPPRESSION OF IMMORAL TRAFFIC IN WOMEN AND CHILDREN ACT 1956 (SITA),IMMORAL TRAFFIC PREVENTION AMENDMENT BILL 2006, aser TRAFFICKING OF PERSONS ( PREVENTION, PROTECTION AND REHABILITATION) BILL 2018 dak sendakba nung tangazükba balala agütsü. Maneni pai Victim Compensation, sexual exploitation, prostitution, force Marriage, labor exploitation aser pornography dak sendakba nunga tangazükba balala agüja liasü.
O.C Women Police Station, Achila Pongen lenisüba kübok iba sentong ya aka. Sentong nung W.V Patton CJM & Secretary to MDLSA, Nodal Officer SAKHI-OSC alkteta jaoker ama arua aden aser ABI Kitska New Reserve DEF, Mkg-i tepela o jembi. Iba sentong nung District police Officers, Police personnels aser UNIT Arogo nungi züngsemtem arua aden. Sentong tembangba sülen süngojemba mapang agia liasü.