MKG nung Yoddha Fighting Championship ayonger

Dimapur, November 09 (TYO): Mokokchung kübok Imkongmeren Sports Complex nung Yoddha Fighting ta ajaba Mixed Martial Arts (MMA) championship tan November ita 27-28 tashi agitsü ayongogo.
Tanü tashi nung asayar 15 dak temai shilem agitsü renemba tetoktepba sentong ya Mokokchung nung tan mezüngsüa agitsü asoshi MFC-i ayonger lir.
Fly Weight (Temang touzük seret 50-57 taret), Bantam Weight (Temang touzük seret 58-61 taret) aser Feather Weight (Temang touzük seret 62-66 taret) densema shilem 3 tashi küma lemsar toktepa asayatsü ayongba sentong nung takok angurtem nem senpet sen Lakh 1 dak tema agütsütsü renema lir.
Mokokchung nung alir asayar 10 dak temai iba tetoktepba nung shilem agitsü tenüng züluokba den külemi, tanga state-tem nungia asayar 15 shi iba sentong nung shilem agitsü renema lir.
Tan tetoktepba den sentaktepa MMA nung shilem agiba ajanga peipok mesürtemi exhibition asaya 2 tashi sayutsü renemogo.
Iba tetoktepba sentong nung tetendanger, referee aser merang agi yangluba shiki ajunga MMA-India, Dimapur Unit-i renemtsütsü.
Aonung shi indang ticket sen nisung ka atema sen 300 alitsü aser donor card-a sen 1000 agi ayoktsü renema lir.
Iba tetoktepba nung shilem agitsü atema tenüng züluoktsü anogo tatembangba tan November ita 14 alitsü aser tenüng züluoktsüren tembangba sülen sentong nung shilem agirtem nem terenemshiba agütsütsü.
Iba sentong den sentakba osangtsüsang tali jangjashitsü jangrartemi phone no. 07085474783 ajanga tayonger den tongteprateptsü akok.