Mkg nunga Digital Cable TV den Internet Broadband service tenzüker

MCCI tir Tsükti Lkri Hogulbarnü yangi Elate Hall nung digital TV with internet broadband services maparen tenzüktsüdang tangokba noksa nung angur, pa den Mokokchung Channel kibur Temsü Jamir aser Symbios MD Mongküm Jamir na densem angur.

Mokokchung, June 3 (TYO): Nüburtem asoshi osang tajung kaji Mokokchung nung mezüngbuba Digital T.V den internet broadband service agütsüba maparen ka tenzükogo. Hogulbarnü Elate Hall Mokokchung nung sentong ka agia Mokokchung Chamber of Commerce & Industries (MCCI) tir, Tsükti Longkumeri iba maparen tenzüktsü.

Mokokchung nung iba maparen ya Global Chapter (Lanu Longkumer) aser Symbios Creation Pvt. Ltd den Mokokchung Channel parnok semtepa tenzüker. Tang nungi iba service aginürtemi Mokokchung Channel office (Elate hall) nungi nüngdakbatemji angutsü.

Tanga jila dang nungi Mokokchung market ya balaka lir. Yangi alirtemi service koma agütsür ta asübaji dang masü saka jenjang dalangtiba nung service tajungtiba aser tekaraba aginür, ta MCCI tir Tsükti iba sentong nung jembidang metetdaktsü.

Kohima aser Dimapur nung Aor tulu takar aika liaka, Mokokchung nung shishilembaba maparen inyaktsü mejangrar, iba ama mapang ka nung Dimapur nungi Global Chapter aser Symbios teloki Mokokchung dak rangloka shishilembaba maparen tenzüktsü merangba angudang pelar, ta paisa ashi.

Mokokchung nung tang business tsütsü lanurtem ishika atudaki. Meilongi dang süaka Mokokchungji tejakleni odar. Iba ama mapang ka nung ano Global Chapter aser Symbios nati yangi business tenzükba ajanga Mokokchung shishilemba tsütsü terenlok jenti akatsü imlar, ta paisa ashi.

Tanü alima nung internet melira mapa kecha meinyakteter, anungji, tensa den sütepa nübur nem service tajungtiba agütsütsü nükla yur Mokokchung nung iba ya tenzüker, ta Symbios Creations Pvt. Ltd. Managing Director, L Mongküm Jamiri iba maparen tenzükba nükjidong ashidang metetdaktsü.

Mokokchung nung iba maparen tenzükba den ano local channel tajungtiba agütsütsü merangtsü, ta Mokokchung Channel kibur I.Temsü Jamiri ashi.

Mokokchung nung iba maparen tenzüka service agütsürtemi Mokokchung Chamber of Commerce & Industries (MCCI) office nung amshitsü atema setup box ka den router ka angati agütsüogo.