Mkg nunga ‘freedom from free open defecation’ sentong tenzükogo

Mokokchung DC Sushil Kumar Patel IAS-i jembiba noksa nung angur. Kasa noksa nungsa M.B Longkumer, Er. Yanger Pongen aser Er. M. Kilen Jamir nungera angur. Mkg, August 9, 2017.

Mokokchung, August 09 (TYO): Swachh Bharat Mission (Gramin) sentong kübok “Free from open defecation week” ta sür kima yimdong nung metsümeshiba yimya meshimeshia samatsütsü merangba sentong ka Mokokchung PHE department ajanga yangi Longkumer Kilem Mokokchung nung tenzükogo. Iba sentong ya tan hopta piyong agiyonga aotsü.
Tanü iba tenzükba sentong nung PHED nung inyakertem den ano yimtsüng 15 nungi putu yimsüsürtemi anir Water & Sanitation (WATSAN) züngsemtem arua shilem agia denogo.
Iba sentong nung tongti tesemdanger Mokokchung Deputy Commissioner, Sushil Kumar Patel IAS-i jembidang, merükmejuba maparen ya khen inyaker yutsütsüba mapa ka masü saka maneni inyaka aotsü mapa ka lir, anungji, nübur ajaki tangatetba nung iba mission ya takok angutsü asoshi inyaka odaktsünür, ta tayongzükba ka agütsü.
Merükmejuba maparen dak sendakba nung asen jakdang teinyaktsü aika lir, anungji, sorkar dak meimlai asen yimya aser mulungsentsü melenshir inyaktsü asoshi paisa ajungshia liasü.
Iba sentong nung tayongzükba o jembir, SBM Mokokchung District Chairman tsürabur M.B Longkumeri jembidang, mapang tatsüka tsüngda nung Mokokchung district kübok yimdak yimtsüngtem nung kima yimdong nung metsümeshiba yimya indokogo ta sangdongbaji asenok asoshi tepelatsü osang ka lir, anungji, iba dak sendakba nung meranga inyaker ketdangsür ajak dang pelaba lemsatep.
Merükmejuba ya mission mapa amai ka lir, iba nung yabo tamangba yimsü kecha sentaka mali, anungji, ajaki iba asoshi ano maneni meranga inyaktsü asoshi paisa tayongzükba ka agütsü. Merükmejuba ajanga asenok anema aliba dang masü saka tangar asoshia tatishitsü tajung ka lir, ta paisa shisem.
Yimdak yimtsüngtem nung kima/yimdong nung metsümeshiba yimya meshi-meshia samatsütsü asoshi inyakba sentong ya Mokokchung district nung 2016 küm tenzük. Aji oda, ketdangsürtemi bushidanga aoba mapang Mokokchung district rural area nung metsümeshiba tesem junga maliba kibong 12000 shi bushiteta liasü, ta PHED Mokokchung Division E.E, Er. Yanger Pongeni metetdaktsü.
Iba dak sendakba nung PHE dept-i taküm June 2017 tashi nung metsümeshiba 12000 dak tema yanglutsüogo, anungji, Mokokchung district kübok yimdak yimtsüng nungbo joko kima yimdong nung metsümeshiba yimya (open defecation) mali kümogo, ta paisa ashi.
2019 tashi nungbo India lima kima yimdong nung metsümeshiba yimya khenyongi melidaktsütsü sorkar nükjidong lir. SWM (Gramin) ‘freedom from free open defecation’ sentong ya tongtibangsa tajemtsü tzü tajung agütsüba den asen aliba temeket merükmejutsü (environmental hygiene) nükjidong yur inyaker.