Mkg PHED-i ayongzüka Intl. Women’s Day amung

Mokokchung, Metsüremi 08: PHED-i ayongzüka Swachh Bharat Mission (Gramin) kübok Swach Shakti Week den repsema ‘International Women’s Day’ sentong takok ngua agir külen, SBM Ambassador, Tsükti Lkr den PHED staff aser shilem agia adenertem külemi tangokba noksa nung angur. 

Mokokchung, Metsüremi 8 (TYO): Metsüremi 4 nungi tenzüka Mokokchung PHED pur ‘Swachh Bharat Mission (Gramin)’ kübok ‘Swachh Shakti Week’ munga aruba den külemi parnokisa Yangtepnü Longkumer Kilem, Mokokchung nung ‘International Women’s Day’ sentong tajung ka ayongzüka kaogo. Iba sentong nung yimtsüng 15 nungi tetsür WATSAN züngsemtem dena liasü.
Tanü iba sentong nung tetushi tesemdanger, District SBM Ambassador, Tsükti Longkumer-i jembidang, Swachh Bharat Mission (SBM) ya India sorkar nükjidong tulu yur tenzükba mapatong ka lir, iba ya pei alidak merükmejua ayuba kisüng nung metembanger, anungji, sorkar sentongji kanga junga angateta inyaktsüla aser temelenshi bener arur kaka asütsüla, ta tayongzükba ka agütsü.
Paisa inyakdaktsünüba olen ka lemsatepdang, Tsüngrem tsübuba sülenbo merükmejubaji jenjang tanabuba ta ashiba ama, “pei alidak kisüng merükbaji masü saka pei aliba ki atena orr inyaktsüla”, ta ashi. “Alimai tetsürji ki yangertem (home maker) ta ajar”, anungji, “merükmejuba nung tetsür shilem aser teinyaktsü tulu lir”, ta paisa shisem.
SBM nükjidong ataloktsü asoshi tetsür shilemji kanga tongtibang lir, anungji iba osangji yimdak yimtsüng tashi nung perokshitsü aser angatetdaktsütsü teimla yur iba sentong ya ayongzüker, ta PHED Mokokchung Division, Executive Engineer, N. Yanger Pongen-i metetdaktsü.
Merükmejuba tsütsü shilem tajung agiba ngua PHED-i tepela temaitsü sayua Mokokchung Municipal Council (MMC) sweeper-tem aser Ungma nungi Sanitation Clean Drive züngsemtem nem kuli kaket kaka agi senpettsü.