Mkg police o AKM na külem sür ‘amalitep mission’ tenzüker

Mokokchung, Monupii 14 (TYO): Ao Kaketshir Mungdang (AKM) den külemi yaritepa Mokokchung DEF-i Tentonü (Hombarnü) “Amalitep Mission” ta sür Mokokchung nung traffic tebilemtsü ajema kümdaktsütsü atema maparen tasen ka tenzükogo.
Iba ‘amalitep mission’ ya tongtibangsa traffic police aser public na tsüngda tesendaktep tajung adokba den traffic tebilemtsü ya pongbaloktsü teimla nung tenzükba lir.
Tanü iba mapatong tenzüka AKM-i achayanga Ungma aser Mokokchung yim nungi volunteer 10 anepalua yok aser parnoki police den yaritepa Mokokchung town tesem balala nung yaritepa liasü.
Tanep iba mission tenzükba sentong ka Mokokchung PS-I nung alidang, police ketdangsürtemi volunteer-tem nem ‘traffic ozüng’ aser ‘Motor Vehicle Act’ onük dak sendakba nung nüngdakba shisa balala lemsatepa liasü.
Iba mission tentetba ya tongtibangsa Rongchii (April) 26, 2018 nü Mokokchung nung 29 buba ‘National Road Safety Week’ sentong amungba mapang lokti balala nungi tanishirtemi traffic tebilemtsü dak sendakba nung shisalemsatepdang, volunteers-temi traffic den yaritep nunga junger ta tebilemba ashiba nungi iba ya mapa küma inyakerba lir. Mapang shia volunteer-temi police den traffic maparen nung yariteptsü.
Public kari danga police teyari aginüa lira Mokokchung nung police ketdangsür mobile number yangi agütsür:
S.P – Raghuramarajan IPS: 9676376923
Addl. S.P – Telo Aye : 9862901796
SDPO – Dinesh Gupta IPS : 8837226606
OC PS I – Dy. SP (P) Ninoto: 7291925121
OC PS II: Dy. SP (P) Honkiumong: 8837480731
OC Traffic- S.I Taliyanger Jamir: 8837404641
OC Women Cell – S.I Achila: 9402697228