Mkg Rotary Club-i ayonga traffic tebilemtsü indang shisatokden aka

Mokokchung, May 21 (TYO): Mokokchung Traffic Police den yaritepa Rotary Club of Mokokchung-i May 21 nü parnok Rotary Building nung “Traffic Rules & Safety” onük dak ajemdaker shisatokden sentong tajung ka agiogo.
Sentong nung shisalen sayur Mokokchung Traffic OC, Talimayang, 2nd OC C. Patton aser Hav. Kilem parnoki signal light, horn, chijemer gari aniba, tenüktelen shitak melii gari aniba, gari kaket shitak maliba, helmet magiba, gari shitak nung manenba, aonung light shitak mamshiba, zebra crossing, azüklen nungi alurtemi taturtem nem side agütsüba, arishi küm matong sür gari aniba aser ano tongtibang onük aika bener arua ajaki meteta alitsü atema shisatsü jenti lemsatep. Parnokisa traffic ozüng aibelenertem nem senchi kechisa aser temzüng koba agi aitsür/merenshir itemji dena shisem.
Traffic police-temji gari anirtem atema tekümzüker aser lenmang sayurtem lir, anungji, traffic police-i ashiba angatsüla aser amaliteptsüla, ta shisalen sayurtemisa inyakdaktsünüba o ka ashi. Nüburtem ajak senteper Mokokchung ya tobur tajung aser telinütsü lima ka kümdaktsütsü asoshi parnokisa ayongzüka liasü.
Traffic tebilemtsü ya ulura akümer asüng, Traffic Police kisüngi iba tebilemtsüji tajungba kümdaktsü makoktsü, anungji, public nungi amalitep nungdaker aser traffic ozüng meteta gari anitsüla aser nüburtemia awashi metettsüla, ta parnokisa shisem.
Lokti nungdak ajiteta Rotary Club Community sentong kübok tongtibangsa Mokokchung nung traffic tebilemtsü ya anogoshi tamajungba küma aoba ngua, traffic ozüng meteta alinung dang nüburtem kümzüka aser tiptema alitsü nükjidong yur iba workshop ya ayongogo, ta Rotary Club of Mokokchung tir, Tiarenlai sentong okila jembidang metetdaktsü.
Iba shisatokden nung kechisa angazükdir itemji mapa küma benshiba den pei kibong aser pei adenba lokti balala nung lemsatepdaktsünür, ta laisa tarurtem dang temepishiba ka shisem.
Sentong nung Mokokchung nung aliba taxi union den ano gari balala anishir telok tentet balala nungi arua shilem tajung agia aden.