Mkg Rotary Club pur tejen tasen melentepba sentong agi

Mokokchung, Aug 14 (TYO): Rotary Club Mokokchung pur Honibarnü yangi Black & White Restaurant Mokokchung nung 43 buba 2016-17 kümsük asoshi tejen tasen melentepba sentong nung Installation Officer, Zone IX District 3240 nung Asst. Governor (AG), Rtn. Akokla Lucy densema meraketa agiogo.
AG Akoklai iba sentong nung jembidang Rotary Club ya ajak asoshi lir, Rotary yagi meimchir/nüburtem tenzüker, anungji, tanur tain ajaki iba nung shilem agitsü asoshi tayongzükba ka agütsü.
‘Tanü ni iba jenjang tongtetba ya tongtibangsa, Mokokchung Rotary Club nungi züngsem tain Rtn. M.B Longkumer ama aser tanga senior Rotarian-tem nungi tejangraba tulu ngur kü mulungsentsü melenshia tenzükbayong lir’, ta lai Rotarian taintem nem tenüngsang agüja ashi.
Rotary Club ya sabang tajungtiba lir, iba nung züngsem ka ama tenzükba ajanga shisatsü jenti angazükba den tajungshiba angur aser lenisüba sempet yanglur, anungji, Rotary Club dak sentakba sentong ajak nung züngsem ajaki maongka ama agia akokba tashi shilem agitsü asoshi lai ajungshia liasü.
“Mokokchung ya Nagaland asoshi tanüdangtsü (aina) lir, ajaki Mokokchung Rotary Club dak rangloker, nenoki nübur asoshi tesüngmangtsü aser sayatenya mapatem inyaktettsü”, anungji, “nenok tejangraba tesamadaktsüba”, ta laisa ayongzük.
Mokokchung Rotary Club-i nübur asoshi mapa tajung jenti inyakba ngua Rotary International-i 2015-16 kümsük atema konang tulu aketba senpet itemi agütsü; Best Club of the Zone Award, Outstanding Project of the year Award, Speedy President Award, Best Monthly Report Award, National Polio Awards, aser 2015-16 Presidential Citation (Gold) ward-tem ngua liasü. Item senpettemji; AG Akokla Lucy ket nungi agizüka liasü.