Mkg TB centre nung CBNAAT kol amenokogo

Nuklutoshii World TB Day amungba sentong nung nung o jembidang.

Mokokchung, March 24 (TYO): Brihostibarnü Nagaland Highway, Mechanical Engineering & Election Minister Wb. Nuklutoshii “CBNAAT” machine ta ser kol tasen ka yangi District Tuberculosis Centre Mokokchung nung lapoktsüogo.
Iba kol tasen amenokba ajanga TB tashidak anema raraba den nüburtem asoshi tajangzük tulu angutsü imlar ta tanü tongti tesemdanger Nuklutoshii yangi Dr. Imkongliba Memorial District Hospital Mokokchung nung TB anogo amungba den repsema CBNAAT machine amenokba sentong nung jembidang metetdaktsü.
Iba ama kol tasen adokba yagi anema aliba tsütsü kanga renloka aoba temaitsü sayur. Aji oda, anogo shia tashidak balala atema machine tapu tapu adokyonga aor. Aji süaka, item machine-tem jagi aneptsüba maparen nung meimchir temeim aser aria bilem melentsü makok, ta paisa ashi.
Anungji, “doctor aser nurse-tem dang ya dang mepishia ashir, meimchir taküm asoshi nenoki tamaren mapa inyaktettsü bena alinung, nendaka, bendanga aser temeim nung inyakdaktsüner”, ta paisa ayongzüka liasü.
Iba CBNAAT kol ya Nagaland nung tanabuba Mokokchung nung amenoker asütsü. Mezüngbuba kolji Dimapur nung amenok. Iba kol yagi TB tashidak melamela puteta anepaluteter ta osang ajanga angazüker. Mokokchung district nung TB tashidak noklang shilem nung shilem tokurbo anepogo ta department osang ajanga metetdaktsü.
Taküm alima TB anogo amungbaji lungjemer TB tashidak samatsütsüba omen nung ayongzüka liasü. Tanü iba sentong nung Chief Medical Officer Mokokchung Dr. S.S Akabai Revised National Tuberculosis Control Program (RNTCP) indang teratet tatsüka ashi aser IMDH Medical Superintendent Dr. Medemi tepelaba o jembi.