Mkg tesem balala nung yipru ajanga teraksa ajuru

Mokokchung, April 16 (TYO): Tawa tanü yipru aser tzünglu tulu aruba ajanga Mokokchung district kübok tesem balala nung teraksa ajuruba osang ajanga angazüker.
Tanü iba osangbeneri Mokokchung ADC, Rajesh IAS den jembidang, tang tashi official osang arubaji Chuchu circle nung ki 10 shi raksaba lir, Ongpangkong circle nung ki 15-20 shi lir aser town circle nunga ki 10-15 shi raksaba osang tonga lir. Item kiji teimba kilem ponger aoba aser süngküm tongnü raksabatem liasü ta metetdaktsü.
Item teraksa ajurubatem indang osangji NSDMA dangi yokogo, ta Rajesh-isa ashi. Iba ama alima yimya lendong balala atalokdang pei alidak sorkar yimsüsür (concerned administrator)-tem nem osang yakta agütsütsü asoshi paisa temetettsü ka ashi.
Ajungben lendong tulu ajurudang nüburtemi District Emergency Operation Centre (DEOC) number 0369-2225103 mesüra State Emergency Operation Centre (SEOC) number 1070 nung osang agütsütsü akok, ta Mokokchung ADC-isa metetdaktsü.
Tawa tanü tsünglu tulu aruba ajanga Mokokchung temeket tesem aika nung kilentsü junga moui nangdena kar aser tesem aika nung janatemji gari lenmang sünga yimshia lir, itemji teimba nisungtem mekümdangba nungi ataloker, anungji, nüburtemi janaona mashimashi meindoktsüla, ta Mokokchung ADC & MMC Administrator Bendanglilai iba osangbener den jembidang metetdaktsü.