Mkg town quasquicentennial sentong Dec 13-16 alitsü lemtetogo

Mokokchung, Oct 5 (TYO): Mokokchung town kümer küm 125 ajungba quasquicentennial benjong den repsemba kümshi ayongba M-Fest sentong taküm Dec 13 nungi 16 tashi amungtsü aser iba atema luden balala shimer mazüngi maparen balala inyaktepdaki ta Mokokchung Deputy Commissioner, Sushil Kumar Patel (IAS)-i Hombarnü yangi ADC Planning conference hall nung osangbener senden ka nung metetdaktsü.
Paisa sentong nung keta aliba kar lemsatepdang, Dec 13, 2015 nüji Mokokchung town nung aliba arogo, fellowhip aser tamangba balala nung quasquicentennial nüngtem temoatsü meshia sarasademba sentong ka ayongzüka akatsü ta ashi.
Dec 14 nungi tenzüka inti benjongji agitsü aser iba anogoji yimsüsür kar jaoktsü aser quasquicentennial nüngtem nüngo kaket sayatsü. Kidanger Tuensang, Wokha, Zunheboto district nungia sobaliba yartsüngsang aitsü.
Dec 14 nikongdang ward-tem rongnung ar atsüteptsü (tetsür/tebur), Martial Arts saya, Mahattam (greatest) muthia, Mokokchung nung band tajungtibatem (akhi aser tang) etc. Iba anogo nungi tenzüka Imkongmeren Sports Complex nung ‘Food Fest’ ta ser chiyungtsü ayokdak süki lapoktsü, aluyimer aser business balala inyakertemi yokshiyokratsü (fair) süki lapoktsü, tanurtem atema kids carnival aser stalls balala lapoktsü ta paisa ashi.
Dec 15 nüji Inter-ward volleyball tournament akatsü, tanurtem atema P.Shilu Park nung asayadak (Cosplay) alitsü, taintem (senior citizen) atema town hall nung sentong balaka alitsü aser yangji free medical treatment agütsütsü.
Iba den ano jangratemtsü kaji ‘Vision Mokokchung 2014’ onük nung penal discussion ka Cosmos hall nung alitsü aser yangji lenla balala nungi takutet nübutem jaoka shilem agitsü. Iba panel discussion nungi teinyaktsü bangzüng kar latettsü merangtsü ta Mokokchung DC-isa metetdaktsü. Iba aonungji Nagaland Open Free Style Dance Competition aser Fashion Show nungertem alitsü.
Dec 16 nüji tatembang sentong den külemi “Naga Orpheus Retro Nite” ta ser kentenmenü sentong balaka akatsü ta angazüker.
Mokokchung town küm 125 ajungba den külemi Nov 4 aser 5 anogo ana Tour De Hills-3 (motor rally) sentong ka ayongzüktsü. Iba rally-ji Mokokchung district kübok administrative HQs ajak tangshitsü, aser iba mapang shilem agirtemi parnok anenzükba tesem ajak nung Mokokchung town quasquicentennial benjong osang posters/pamphlets/banners ajanga peroktsü ta Mokokchung DC-isa ashi.
Iba rally-ji district administration aser Mokokchung District Sports Council akhüm nung Adventure & Motorsports Association of Mokokchung (AMAM)-i ayongzüktsü. AMAM-isa Nov 6 & 7 anogo ananü Mokokchung Imkongmeren Sports Complex nung Auto Cross sentong ayongzüka lir ta paisa ashi.
Iba denji ano Mokokchung District Art & Culture Council (MDACC) akhüm nung Mokokchung Art & Aesthetics Management (MAAM)-i Miss Mokokchung 2015 sentong Nov 6 nü Mokokchung town hall nung ayongzüktsü sentong renemogo ta paisa shisem.
Iba quasquicentennial benjong ya Dec 24, 2015 nü Mokokchung nung kümshi agiba “Cake Race” aser Dec 31, 2015 nü “Midnight Watch Service” agia tembangtsü ta Sushil-isa ashi.
“Iba sentong ya kanga tulu aser ibai asenok atema tongtibang ka lir, anungji, kija aser lokti ajaki tangatetba tajung nung shilem agia yaridaktsüner” ta paisa nüburtem dang tayongzükba ka agütsü.
Iba quasquicentennial benjong ya 55 lacs budget nung inyaker ta Mokokchung D.C-i osangbener kati asüngdangba ka langzüdang ashi.
Iba sentong nung District administration den külemi Ao Senden, Watsü Mungdang, Ao Kaketshir Mungdang (AKM), Mokokchung Press Club, All Ward Union Mokokchung Town aser ano telok balala nungi ketdangpurtem densema liasü.