Mkg yimdak PMVY sentong ka agi

Mokokchung, Rongchii (April) 26 (TYO): Pradhan Mantri Ujjwala Yojana (PMUY) sentong dak sendakba PMVY ketdangsürtemi ayonga sensaksem sentong ka Mokokchung yimdak putu yimsüsürtem den menogo.
Iba sentong nung Nitumoni Das (Nodal Officer Mkg), Bendanginla Longkumer (IOCL Chief Manager, New Delhi) aser Longkumer Gas Agency kibur M.B Longkumer nungeri tongtibang shilem agia iba PMVY sentong indang tatongi rateta shia liasü.
PMVY ya tongtibangsa yimdak yimtsüngtem nung tetsür tepetzük tia nung alirtem (BPL) nem merükmejua sorochiokdaktsütsü nükjidong yur angati LPG new connection agütsür. India sorkari iba PMVY sentong ajanga noklang nung noklang shilem LPG connection agüja taruba ita May 5th, 2018 tashi nung ‘mekozü maliba yimtsüng’ (smokeless villages) kümdaktsütsü nükla yur inyaker.
Yimdak yimtsüngtem nung tetsür arishi küm 18 tema shirnok Below Poverty Line (BPL) jenjang nung lir, parnok nemji iba maongka ya agütsür, ta Mokokchung Nodal officer, Nitumoni DAS-i metetdaktsü. Iba den paisa iba maongka agitsü atema kaket kechisa nüngdaker item indang shia liasü.
Tang tashi nung PMVY sentong ajanga Mokokchung district kübok noklang tenet dak tema nem iba teyari ya agütsüogo, ta osang ajanga angazüker.