MKG: Yoddha Fighting Championship Nov. 27-28 nü agitsü

Dimapur, November 24 (TYO): Mokokchung kübok Multipurpose Sports Complex nung Yoddha Fighting Championship tan November ita 27-28 nü tashi agitsü ayongzükogo.
Merang agi atsübanger toktepa züktepba tetoktepba nung India linük ajunga nungi nungtugu asayartemi shilem agitsü renema lir.
Mumbai yimti nung tentetba Yoddha FC den tangatettep nung MFC teloki ayongba Yoddha Fighting Championship nung referee, tetendanger, time keeper aser merang atsü ajunga Yoddha FC-i renemtsütsü.
India ajunga nungi Yoddha FC fighters 16 den külemi, Nagaland nungia parnok 20 dak temai tan asayamong nung shilem agitsü renema lir.
Tan asayamong nung takok angurtem nem ajak agi senpet sen lakh 1 dak tema agütsütsü asoshi tayongeri renemba osanga jangjaogo.
Iba asayamong reprangtsü ticket sen jenjang anonung ka atema sen 1000 (Nisung 2) aser sen 300 (Nisung 1) alitsü aser ticket-ji El Marcado, The Restaurant aser Walim Enterprises nung angutsü.
Television nung sayuba Ultimate Fight Championship (UFC) kanga jangratepa reprangba ngua aser alima ajunga nung Mixed Martial Arts (MMA) kanga dang nungtugu akümba ajiteta, Nagaland nunga MMA jenjang tajungba kümdaktsütsü nükjidong nung iba Yoddha asayamong ya ayonga lir.
Tan asayamong nung shilem agirtemi peipok mesütsüsa national aser international jenjang nung ayongba MMA tetoktepba balala nung shilem agitsü ajungmesotsü alizüng yur tayongeri iba asayamong ayongzükba osanga jangjaogo.
Ano, tejangrartem asoshi MMA sayu sentong ka Mokokchung kübok Multipurpose Sports Complex nungsa tan November 26 nü agitsü asoshi ayonga lir aser Dimapur nung tentetba Combat Academy nung ketdangsertemi MMA tesayubaji agütsütsü.
MMA agitsü jangrartemi phone no. 07085474783 ajanga MFC den tongtepratepa osangtsüsang tali jangjashitettsü.