MKG:Kiyong sasep Beat Contest December 17 nü akatsü

Mokokchung, November 29 (TYO) : December 17, 2016 nü Mokokchung jila nung aliba nüburtemi kanga sapuba, 1980s mapa atenba, rock music bilemteta, lanur mongin ishika senteper kiyong sasep Beat Contest ka Town Hall nung ayonga akatsü sentong renema lir.
Iba sentong ayongertemji –‘Temulonger Telok’ — nisung 9-i akümba telok ka lir. Parnok ya entrepreneur tem timba ser musician tema dena akümba telok lir aser parnok ajaki 1980s mapa nung atenba kentem meimer. Anungji parnoki iba sentong ayongtsü lemtet.
‘Parading of Change’ omen nung ajemdaker tentetba ‘Temulonger Telok’-i ayonga aliba contest ya Mokokchung town nung Ward Council tem ajaki nungiter aser iba sentong atema kanga sashia renemtepdar.
Iba tetoktepba nung ward shia nungi telok kaka ang shilem agidaktsütsü aser telokshiai 1980s mapang atenba ken anana atentsü. Item ken ana rongnung ‘winning song’ ji Queen teloki atenba nüngtugu ken ‘I want to break free’ alitsü. Sentong nung guest band aser tanga tejaokertemia shilem agitsü.
Iba sentong ya rock music tanaben meyipa bener arutsü nükjidong nung ayonger, ta sentong ayongertemi ashi. Item ken ya taoba putu nisungtemi kanga sapua angatep aser tanü tashi angar.
Rock music ya tensa ajunga nung angatetba kentem lir aser putu shia tajungba küma angateter;ibaji temulung nung yur, sentong ayongertemi December 17, 2016 beat contest sentongji “Music a life, a soul to everything” omen nung ajemdaker ayonger.
Takok angurtem nem senpet agütsütsü aser tematiba jenjang nung takok angur nem senpet timba agütsüba den running trophy-a ka agütsütsü.
Iba tetoktepba atema entry form temji ward council shiai acha ayanga December 10, 2016 nü tashi nung saruseptsü.
Osang tejangja metetnertemi Convener, Impo den #8575208706 nung aser Secretary, Mulungchet den mobile number 8974669739 tem nung tongteprateptettsü.