Mkkg nung Global Iodine deficiency disease prevention day mungogo

Deputy Chief medical Officer aser Mokokchung jila nung shishilembartem külemi tangokba noksa nung angur.

Dimapur, Mongputeni/Oct. 22 (TYO): “Iodised Salt, Traders Responsibility” omen nung amendaker Mongputeni/October 22 nü Mokokchung Municipal Council Conference Hall nung Mokokchung jila nung metsü shishilembar den Global Iodine deficiency disease prevention day mungogo.
Iba sentong ya nüburtemi Iodine shidak amshidaktsütsü aser Iodine peria maliba ajanga temang nung timtem adokba metetdaktsütsü nükjidong nung ayongzük.
Iba sentong nung Deputy Chief Medical Officer, Dr. Kibangkumba ajanga temang nung Iodine koma tongtibang aser iba ajanga thyroid shidak alitsü atema kechi mapatem sa inyaker, item onüktem lemsatepa liasü, ta Medical Department ajanga sangdongba nung shia lir.
Temang nung Iodine shidak maliba ajanga timtem jenti adokdaktsür aser iodine deficiency disorder adokdaktsür, ta pai ashi.
Iodised metsü mita reprangba aser tendangba mapatem ASHA ajanga dokan ajak nung inyaktsü, ta Dr. Kibangkumba-isa ashi. Nisung achitsü asoshi iodised sür aliba metsü dang ayoktsü asoshi iba sentong nung adener metsü ayokertemi tenangzüktep agia liasü. Iba sentong nung metsü shishilembar, MMC züngsem aser Chief Medical Office nungi ketdangsürtem arua dena liasü.