MKR Pillai indang osang nung taitsü keta lir: ACAUT

Dimapur, June 10 (TYO): Kerala kübok Pandalam nung amenoka aliba Sreevalsam group indang kiojen 30 tashi mita aodang sen crore 1000 dak tema rongsen aliba putetba osang Income Tax ketdangsertemi metetdaktsüogo.
Sreevalsam group kiburji Nagaland nung taoba Addl. SP aser consultant to DGP Nagaland, MKR Pillai lir aser IT ketdangsertemi Pillai ji Nagaland nung yimten yimsüsür aser ketdangsertem den teyariteper ka ta temulung melemi bilembaji shitak asütsü akok, ta Media Cell, ACAUT Nagaland-i sangdong ka nung metetdaktsü.
Yimsüsür aser ketdangsertem den teyariteper ka aser Centre nungi aruba senotsü tim mesüi belener ta tai tongloktsüba onüktemji shitak asütsü aser iba ya mapa tulubalen shilem tila ka putetba dang lir. Anungji, IT ketdangsertemi kuli kwika bendenteter ta asüba nungji ajemdaker, yimsüsür o ketdangsertem tesentaktep yur ozüng alema mapa inyakba yimjak nung metettsü, ta parnokisa ashi.
Nagaland state ya nisung tamajung aser mashimemetetertemi ketdangsür ama ajiteter, kechiyong parnoki non-local tem teyari medeni mapa kecha meinyakteter. Tinku, Dinnath aser Pillai nunger amala ochimashi Non-Local temi Naga nunger ajungtsü atema kecha mebilemtsür saka ozüng alema mapa tapu balala inyakba ajanga senotsü ajak auyazüker, ta Media Cell sangdong nung shia lir.
IT ketdangsertemi iba osang yimjak nung metetdaktsüba ya I-T Nagaland aser State Vigilance Commission (SVC) saksalemtsü mapang ka lir. Küm paika ya I-T Nagaland-i kechisa inyaka aru ta nisungtemi süngmangseta bilemer. Tanga state tem nungbo SVC aser I-T department temji ajaki tsübuba teloktem lir, saka Nagaland nungbo parnokji tema tazütsü atema tentetba teloktem amai dang lir, ta parnokisa ashi.
Income Tax (I-T) Nagaland-i Income Tax exemption certificate agütsüba dang masü saka I-T ajanga bushisüngdang asüba ajak nung yariteptsüla. Ajidang masü, Income Tax (I-T) Nagaland-ia senotsü tim mesüi amshiba dak sendakba maparen, pei sasa bushisüngdangtsüla. Maneni SVC-ia MKR Pillai-i Nagaland nung consultant ka ama inyakba mapang aser Nagaland nung pa indang proxy business dak sendakba onüktem bushisüngdang asütsüla, ta ACAUT-isa ayongzük.
Nagaland nung nübortemi ochimashi mapa inyakbaji kecha balaka masü ama dang bilemer, kechiyong yimjak nung tuteta sayuaka aser metetdakjaka, nisungtemi kecha mashir aser odang toktsür. Ajisüaka, asenok Naga nungertem saksalemtsüla aser temenen talenba nungi salar, asen jenjang tajung aser akhüm tanaben lepa bener arutsü atema merangtsüla, ta ACAUT Nagaland-isa mepishia metetdaktsü.