MLA 10-i menden toktsü; NPF party nungia anen

Kohima, Aenjeti 30 (TYO): Election Commission-i Tsüklai 27, 2018 nü Nagaland Assembly elections atema official notification agütsütsü anogo ka dang lia Naga People’s Front (NPF) nungi MLA 10-i State Assembly aser Party nungi anenogo.
MLA menden toktsür aser NPF party nung anenertemji Noke Wangnao, Tokheho Yeptho, Pangnyu Phom, Dr Neikiesalie Nicky Kire, Zhaleo Rio, CM Chang, Deo Nukhu, Pohwang Konyak, Namri Nchang aser Neiba Kronu nungertem lir.
“Yaküm Luchii 15 nü Nagaland Assembly-i India sorkar dang election magidang Naga yimten latettsü ajungmesotsü lemtetba ama aser nübortemi election magidang Naga yimten latetdaktsünüba pusema aser ano yashi civil society tem, tongti kin hohotem aser Nagaland nung political party temi election magitsüla ta telemtetba agiba nung ajemdaker onoki MLA menden toktsür aser party nungi anener” ta MLA 10-i sangdong ka nung metetdaktsü.
Parnoki yashi NLA Speaker Imtiwapang nem MLA nungi anenba shidi agütsü aser kasa anogo nung item mendenji tazüng ta sangdonga liasü.
Iba ajanga Nagaland assembly nung MLA 13 (NPF 12 aser Independent 1) menden nungi anenogo.
Züngsem 60 agi akümba Assembly nung NPF MLA 35, BJP 4 aser Independent 7 anünga lir aser menden 14 tazüng lir.
MLA menden toktsür parnok nisung 10 jagi parnok kechi telok nung adentsü’ar mashi saka parnoki Nationalist Democratic People’s Party nung adentsü ama ajiteter.
Parnok asemben tashi chief minister inyakba aser tang teinyakdak Lok Sabha MP, Neiphiu Rio pusema nungittsü südi ta bilemer kechiyong NDPP sentongtem nung parnoki shilem agia aruogo.
MLA menden toktsür aser taoba Minister Neiba Kronu-i osangbener den jembidang parnoki NPF President Dr Shurhozelie Liezietsu nem party nungi anenba shidi agütsüogo ta ashi.
“Naga nungertemi ‘solution before election’ ta yimyim agütsüba onoki pusema nungiter aser election agi nung dang onoki party koba nung adentsü’ar lemtettsü,” ta Neiba Kronu-isa shisem.
Nagaland Legislative Assembly nungi MLA 13 anenogo aser parnok rongnung anabo BJP nung denogo.