MLA 3-i NLA & NPF nungi anen; NLA nung MLA 43 dang kümogo

Kohima, Tsüklai 2 (TYO): Nagaland Assembly election agitsü mapang tonga arudang Naga Peoples Front (NPF)-i maneni timtem ajurur aser tanü-a NPF MLA asemi menden toktsüogo.
NPF MLA temji Dr Longrineken, L Khumo Khiamniungan aser Pukhayi Sumi nungertem lir ta Nagaland Legislative Assembly nung Commissioner & Secretary, N Benjamin Newmai-i metetdaktsü.
Assembly Speaker Dr. Imtiwapang Aier-i Dr Longrineken aser L Khumo nati menden nungi anenba shidi zülua agizük aser Pukhayi-i züluba shidiji Aenjeti 31 nü agizüka liasü, ta Newmai-i tanü ashi.
Par asemprongla ya T R Zeliang-i aniba NPF sorkar nung Parliamentary Secretary tem liasü.
Par asemi menden toktsüba ajanga züngsem 60 agi akümba assembly nung MLA 43 dang kümogo, kechiyong Independent ka dena MLA 13-i Aenjeti nung menden toktsüogo aser yaküm Rongjui ita Kiyanilie Peseyie asüba sülen menden ka tazüng aküm.
Tang Nagaland Assembly nung NPF MLA 32, BJP nungi 4 aser Independent 7 lir.